Mama di Xander Bogaerts for di Los Angeles:“ Emocion tabata halto”

LOS ANGELES – Un di e personanan mas nervioso porta diadomingo anochi, tabata mama di Xander Bogaerts, Sandra Brown. Rondona pa su otro yiunan y famia, e mama a conta NoticiaCla cu el a wak e wega na Los Angeles den stadion y mira con hunto cu su yiu, e ekipo di Boston Red Sox a titula campeon mundial di Baseball Grandes Ligas. “Emocionan tabata halto, felicidad, orguyoso” e mama a cuminsa bisa NoticiaCla for di Los Angeles dialuna. “Alivia cu e la caba!”Brown a sigui bisa e portal aki. 

CELEBRACION

Diadomingo anochi mes e ekipo a celebra e Victoria mei mei di e hungadornan, nan famia y gerencia. “Tur hende a haya chens pa saca potret cu e trofeo”, e mama contento a sigui bisa. “Ora cu tur cos a caba, Xander a bay drumi”.  E celebracion ta continua diaranson awor na Boston ora cu nan tene nan parada di Victoria pa 11’or di mainta den centro di Boston. “Cu poder di Dios, asina e ta planea te awor” e mama a sigui bisa. Pa loke ta e regreso pa Aruba, no tin fecha ainda, y no ta conoci si Xander ta bolbe Aruba cu nan. Pa awor, nan ta preparando pa bolbe Boston pa despues bin Aruba. 

VICTORIA

Diadomingo anochi, Boston Red Sox a titular campeon despues di a derota Los Angeles Dodgers den nan casa, (esta di Los Angeles), cu e score di 5-1. Cu esey nan a logra gana 4 di e 7 weganan necesario, y despues di a hunga un wega maratonico dos dia prome di 7 ora y 20 minuut, cu a bira e wega mas largo di historia den temporada final.