Preparando pa protesta serca gobernador y na Nacionnan Uni

ORANJESTAD – Gobierno di Aruba (lesa premier Mike Eman) ta preparando pa biaha pa Nacionan Uni dentro di 24 ora pa protesta oficialmente riba e loke cu tanto gobernador como gobierno di Reino ta haciendo cu Aruba. Manera cu NoticiaCla a informa den forma di primicia diahuebs mainta, Hulanda no ta nada contento cu e desaroyo cu ta surgiendo na Aruba. E hecho cu ainda no tin un comision instala, y cu Aruba a manda nombernan cu Hulanda mes a rechasa (pasobra no ta considera nan imparcial), ta pone cu e pasenshi ta cabando.

Gobierno di Aruba di nan banda, ta sintiendo e presion di Hulanda y a reuni den su seno pa 2 dia pa bin cu un plan di atake. E ta ensera entre otro, reuni diabierna mainta cu gobernador pa protesta personalmente contra loke ta pasando,  y despues e lo mester subi avion pa Merca pa atende cu Nacionnan Uni. Esun cu lo reuni cu gobernador ta e propio Mike Eman, cual bishita a wordo confirma tambe na NoticiaCla diahuebs merdia. No ta conoci cu ken exactamente e lo reuni na nacionnan uni, pero tur esaki a wordo discuti durante reunionnan di e ultimo dos dianan entre e ministernan y nan respectivo consehero.

Loke tambe NoticiaCla a haya confirma ta cu diabierna tin e ultimo Conseho di Minister di Reino unda cu riba agenda tin entre otro nombracion di sr Mito Croes como candidato di Aruba pa Raad van State, cu tin cu reemplaza Hubert Maduro. Mes momento tambe a compronde cu e ‘aanwijzing’ di siman pasa cu lo mester a wordo bari for di mesa, lo ta bek riba mesa, si en caso pa diabierna no tin algo concreto.

Pa algun dia nan a bin ta reuni Faltando un dia prome cu Conseho di Minister di Reino tene su ultimo reunion prome cu recess, ainda no tin un comision instala pa investiga e presupuesto 2014. Diaranson premier Mike Eman a informa publicamente cu di parti di Aruba a manda nombernan di esnan cu Aruba kier den e comision, y ta wardando esunnan di Hulanda. Problema a bira ora cu Hulanda a rechasa e tres nombernan, esta srs Tuinstra, Herry Koolman y Richard Arends. Hulanda a rechasa e nombernan aki pasobra e no ta considera nan como personanan imparcial na e gobierno. Richard Arends actualmente ta den servicio di sr Mike de Meza y e otro dosnan lo tin lasonan estrecho cu e gabinete actual.

NoticiaCla a confirma tambe, cu e hecho cu Premier Eman ta nengando rotundamente cu comision di CFT lo ta esun cu ta investiga e presupuesto, no a cay den bon tera na Hulanda. De hecho, for di Hulanda Premier hulandes Mark Rutte lo a atende Eman riba e asunto aki y a mustra cu e tin cu stop di nenga e acuerdo aki, pasobra e mes a acorda esaki cu Hulanda un siman pasa.