Segun Wever, Venezuela mester controla su fronteranan miho

ORANJESTAD – Venezuela no ta controlando su fronteranan miho, y ta permitiendo balseronan sali di nan pais. Por lo menos asina prome  minister di Aruba Evelyn Wever Croes a indica dialuna mainta durante un conferencia di prensa. Segun e prome mandaario, refiriendo riba e problema migratorio actual cu Venezuela, parti di e convenio pa por a habri frontera bek entre Aruba y Venezuela algun luna atrasa, tabata e.o. cu Venezuela ta controla su fronteranan miho y no ta permiti balseronan sali mas. “Y esey no ta sosodiendo” Wever a reclama awe mainta den direccion di diputadonan di e estado Falcon. E diputadonan a bisa den e portal ‘elpitazo.com’ cu nan ta bay haci un reclamo na Hulanda pa ‘Aruba y Corsou trata e refugiadonan, esnan cu ta huy di nan pais, na un forma mas humano”. Segun Wever, ta Venezuela mester haci un miho trabou, y no Aruba. 

MENSAHE PA VENEZUELA

Wever a sigui bisa cu cos no ta keda aki, y a manda un mensahe caba pa e diputadonan via embahada Hulandes, cu lo a declara esey recientemente na estado Falcon, e parti mas cerca cu Aruba. “Lo mi kier bisa e diputado, y esey ta e mensahe cu nos a manda tambe (via embahada Hulandes), cu e responsabilidad primario ta cerca bo. No cerca nos” Wever a bisa. Segun Wever, si Venezuela ta brinda e ciudadanonan e trato humano, nan no ta cruza laman, nan no ta haya nan den situacion cu nan ta. “Ademas, dia cu nos a habri frontera entre Aruba y Venezuela, nos a yega na convenionan y un di e convenionan ta cu Venezuela no ta permiti balseronan sali mas. Cu Venezuela ta controla su fronteranan miho. Y esey no ta sosodiendo” Wever a bisa pues. Pero como cu Venezuela no ta cumpliendo, ‘ lamentablemente nos ta haya nos cu e consecuencianan’. E mandatario ta sigui mustra cu como pais e ta un peso enorme, un dilemma constante, pasobra ta hende bo ta tratando di dje cu ta huy situacionan hopi inhumano.  “ Y bo kier purba yuda unda cu bo por, pero nos ta sinta den un situacion na Aruba tambe hopi inhumano cu nos no por cumpli cu tur nos hendenan. Y aki ta referi na hendenan local cu no por biba cu e placa cu nan ta ricibi na onderstand y pension di biehez”.  

RESPONSABILIDAD DI VENEZUELA

E crisis migratorio Venezolano primordialmente ta responsabilidad di Venezuela mes, Wever Croes a sigui bisa awe mainta. “Si Venezuela ta brinda su ciudadanonan suficiente perspectiva, suficiente oportunidad, nan no ta tuma e pasonan riesgoso di pone nan bida na peliger” Wever Croes a finalisa bisando. Scucha e declaracion completo AKI.