Un aña di gracia prome cu prohibi productonan cu oxybenzone

ORANJESTAD – Gobierno di Aruba ta duna un tempo di ‘gracia’ di un aña pa e prohibicion di productonan di sunblock cu ta contene ingrediente Oxybenzone. Asina un comunicado di gobierno a bisa den un comunicado e fin di siman aki. Oxybenzone ta un di e ingredientenan principal cu ta comproba na e momentonan aki pa ta sumamente dañino pa coral y bida marino. 

1 DI JANUARI

Esaki ta significa cu ora cu haci e anuncio oficial 1 januari 2019, esaki lo significa cu pa 1 januari 2020 esaki lo ta completamente prohibi akinan na Aruba. E prohibicionnan aki ta particularmente pa garantisa cuido di nos medio ambiente poniendo Aruba riba mapa internacional di ta cumpli cu e deseo cu hopi biaha tin di decisionnan cu mester wordo tuma pa proteha nos medio ambiente.

CARTA NA PARLAMENTO

Manera por corda, gobierno dia 20 di augustus a dirigi un carta pa presidente di Parlamento di Aruba den cual cu a notifica Parlamento cu Gobierno tin e intencion pa prome di januari venidero pone un prohibicion (ban) na uzo di productonan sunblock y/of suntan cu ta contene e ingrediente Oxybenzone. Oxybenzone ta un di e ingredientenan principal cu ta comproba na e momentonan aki pa ta sumamente dañino pa coral y bida marino. ‘Como comunidad nos mester por ta consciente di e daño cu ta wordo causa ora cu nos tin gran cantidad di turista anualmente cu ta uza e tipo di cremanan aki. Plastic ta dañino como cu e no ta biodegradabel. Ora cu benta e plastic afo y e bay den naturalesa e ta haci e tera menos fertil.