Tur atencion ta riba wega Boston vs Los Angeles awe nochi

LOS ANGELES – Awe nochi tin e posibilidad cu e pelotero professional Arubano Xander Bogaerts por gana su di dos renchi di Serie Mundial di Liga Mayor di Baseball diadomingo anochi. Si su ekipo Boston Red Sox gana e partido contra Los Angeles Dodgers, nan ta titular campeon mundial di Major League Baseball, y cu esey, su di dos renchi, cu ta e obheto den baseball professional, mas cotisa. Na 2013 caba Xander den su prome salida a logra haya su prome renchi ora cu Boston na e occasion ey a gana e titulo e aña ey. 

CONFRONTA KENLEY

Durante fin di siman a bin e momento tan spera ora cu Xander a topa su contrincante Kenley Jansen di Corsou. Tur atencion tabata riba e momento ey y hopi hende a comparti nan potret di e wega cu e dos hungadornan aki riba dje. E encuentro tabata tanto diabierna como diasabra. No ta conoci si diadomingo atrobe, Kenley topa Xander. 

WEGA INTERESANTE

E weganan den fin di siman tabata sumamente interesante, cuminsando cu e wega di diabierna, cu a resulta den uno maratonico, 18 inning, durando 7 ora y 20 minuut y a caba te 3’or di marduga cu score di 3-2 pa Los Angeles. Diasabra sinembargo, Boston ta bin bek, di un score di 4-0 den di 7 inning y gana e wega cu score di 9-6 finalmente.  Si Boston no gana e wega diadomingo anochi, e serie ta move pa Boston bek, unda cu eynan tin weganan 6 y 7 diamars y diaranson si ta necesario. Potretnan screenshot Fox Sports.