Sentencia den casacion caso Babel ta fin di November proximo

WILLEMSTAD – E sentencia di corte di casacion di caso Babel ta poni pa dia 27 di November proximo envez di 16 di October 2018. Un di e sospechosonan di e caso, Cicely vd Dijs a confirma esaki pa NoticiaCla diabierna mainta. Si e sentencia cay negativo pa vd Dijs, ta spere un castigo di prison di 9 luna y su pareha, ex premier di Corsou Gerrit Schotte 3 aña di prison. Ta trata di e caso unda cu e.o.   Schotte   a keda sentencia pa e.o.corupcion y labamento di placa, y vd Dijs tambe tin cargo contra dje. Ambos semper a para riba nan inocencia, incluyendo vd Dijs, cu den un entrevista cu NoticiaCla na juni di 2017 a bay den detayes y a para ariba cu e ta inocente. 

APELACION

Despues cu corte di prome instancia a sentencia ambos na castigo di prison na maart di 2016, den apelacion algo mas cu un aña despues na juli di 2017 corte a practicamente mantene e sentencia inicial, (3 aña pa Schotte y 15 luna pa vd Dijs (kitando 6 luna condicional cu ta pone na 9 luna). Mirando cu ley ta stipula cu tanten cu no a yega e ultimo recurso disponibel legal pa un sentencia (cassatie), un parlamentario por sigui eherce su funcion. Pero despues di e sentencia di cassatie otro luna, si esaki tambe sali negativo pa e sospechosonan, e sentencia lo wordo ehecuta mesora. Esey no ta kita afor cu tin ainda chens legal pa cana, pero den e caso aki, contrario na e situacion awor, e sentencia lo keda ehecuta cu lo por nifica castigo di prison pa ambos. Pero ambos ta para ariba cu no tin motibo di preocupacion y cu nan lo keda absolve di tur cargo. Potret cortesia: Yves Cooper.