Camara di Comercio: Elimina dividend belasting y reduci impuesto directo

ORANJESTAD - Segun Camara di Comercio di Aruba, nos regimen fiscal na e momento aki no ta mustra masha atractivo: nos tin e reputacion internacional di tin e tarifa mas halto na mundo di inkomstenbelasting (casi 60%), nos impuesto riba ganashi ta bastante halto (28o/o), riba esey ainda nos tin un dividend belasting cu mayoria di nos competidonan den nos region (p.e. Curaçao y St. Maarten) no tin. Tur esaki Camara di Comercio (KvK) a participa recientemente na prome minister Mike Eman, y cu promesa cu lo atende esaki den e proximo conferencia berde, pa asina Kvk por participa.

Segun Kvk, pa mehora e regimen fiscal, mester elimina dividend belasting, y reduci impuestonan directo manera riba ganashi y entrada personal, cobra mas impuesto indirecto via BBO, BTW o algun otro forma di impuesto indirecto. Mester bisa si cu KvK no ta na fabor di un impuesto riba transaccion bancario, loke lo ser splica den otro publicacion proximamente, pasobra esaki ta un tema riba su mes.

Tambe a papia ampliamente riba mehoracion di e diferente procesonan pa yega na permiso, tanto pa empresa como pa personal. Aki KvK a trece dilanti pa considera converti e procesonan aki di tal manera, cu ora cu un ciudadano (empresa) despues di e termino stipula no haya un contesta, automaticamente mester otorga e permiso. Esaki lo yuda pa caba cu e procesonan di lunas cu ta un estorbo grandi pa sector priva.

A ser treci dilanti tambe e problemanan cu empresanan ta experimenta cu e tramitenan bancario, unda cu ta tarda tin biaha varios luna pa habri un cuenta na banco, pa motibo di e control excesivo previo cu ta tumando lugar; tambe e control excesivo cu banconan ta obliga di eherce pa no haya problema cu autoridad supervisor (CBA, MOT). Nos ta sumamente contento cu S.E. a compromete su mes pa organiza un deliberacion cu diferente stakeholder den e asunto aki, pa logra un solucion cu por satisface tur partido.

Tambe a keda acorda, en bista di e observacionnan di banda di KvK, cu lo trata na logra un participacion mas grandi di empresanan chikito local na e evento di Green Aruba - Europe Meets the Americas, pa medio di un entrada financieramente mas factibel y un evento di 'networking' pa fomenta contacto entre empresa local y empresa di exterior.

Proximamente KvK lo publica e lista aki despues pasa na atende tur e puntonan a base individual.