No tin garantia cu landsbijdrage di gobierno pa AZV lo bira zero

ORANJESTAD – Mientras cu e landsbijdrage a baha hopi ultimo añanan, no tin ningun garantia cu e landsbijdrage di gobierno pa cu AZV lo bira 0. Asina director nobo di AZV Ruben Goedhoop a bisa NoticiaCla den un entrevista recien. Den ultimo añanan te cu awor, e landsbijdrage (suma cu gobierno ta contribui na e fondo di AZV) a baha door di otro factornan manera e maneho di reduccion di gasto di AZV mes, pero tambe danki na introduccion di e asina yama BAZV. Eynan tin un ‘trend positivo’ pa cu e bahamento di landsbijdrage. 

AUMENTO GASTO MEDICO

E ta bahando, pero na mes momento tin un aumento di gastonan medico. Esaki tin di haber cu e factor di ‘vergrijzing’. Mas hende ta biba mas largo, y ta pone mas peso riba AZV. E gastonan di cuido ta bay subi, segun Goedhoop. “Aun si e populacion no crece, e gastonan ta bay subi, pasobra e samenstelling di populacion ta otro”, Goedhoop a continua bisando.

AUMENTA TARIFA

Sea ta aumenta e prima di BAZV of e landsbijdrage, segun Goedhoop. “At some point, it cannot be sustainable. Esey ta gewoon rekenkundig” Goedhoop ta sigui bisa. E gastonan lo keda subi. Sea ta hisa BAZV cu tempo, no awor, pero cu tempo of ta sigura cu via un otro caminda AZV ta haya fondo. Te aworaki Goedhoop no ta wak cu ta bay cambia e BAZV manera cu e ta awor. Pero pa haci AZV sostenible riba su mes, ta dificil. Si pais Aruba bisa cu AZV tin cu sostene su mes, e ora Goedhoop ta haya cu AZV mester tin maneho tambe riba e entradanan. “Si nos no ta controla nos entrada, e ora mi no por maneha”, e director a sigui bisa. Aworaki ta gobierno ta controla e entradanan y ta stipula tarifa etc. Mes momento Goedhoop no ta kere cu AZV lo mester bira sostenible su so. E director ta conciente tambe di e motibo pa baha e landsbijdrage mas cu ta posibel, sabiendo tambe cu e movimento di gasto di cuido lo sigui subi. 

FUTURO

Pa loke ta futuro, director Goedhoop ta wak e situacion financiero di AZV relativamente bon, otro aña tambe ta mustra relativamente abou (e deficit), pero despues, depende con y cua decision ta wordo tuma, p.e. riba cuido di nos grandinan, tin e gastonan cu ne. Por ta aworaki lo bay haci mas na prevencion, cu tambe tin su gastonan. Ta depende riba e decisionan cu pais Aruba y AZV tuma a corto plazo, e director a finalisa bisando.