STA: Accion na NV Elmar pa diabierna no ta sigui mas!

ORANJESTAD – E accion planea pa diabierna na NV Elmar no ta sigui mas. Asina presidente di sindicato STA Diego de Cuba a confirma pa NoticiaCla diahuebs anochi. Motibonan ta cu durante e reunion entre sindicato y e gerencia, a compronde cu e dos personanan suspendi pa cual kier a pone trabou abou, lo no perde nan trabou y nan lo wordo corpora bek den nan posicion na Elmar. Ademas, e sindicato a yega na un acuerdo pa laga e investigacion contra e trahadonan termina, y despues esaki e trahadonan lo asumi nan responsabilidad bek. 

NADA A BAY ROBEZ

Segun de Cuba, for di un principio a mira cu nada no a bay robez y cu ora cu e rapport final di e investigacion wordo entrega na e gerencia nobo di Elmar, esey tambe lo sali na cla. Como tal, gerencia di Elmar a sugeri na e sindicato pa comprension pa cu e pida ey y e sindicato a dicidi cu ta para e accion te ora cu mira e resultado di e rapportnan. 

PAKICO ACCION?

Loke a pone cu e sindicato a yama accion na prome bista, segun de Cuba tabata e confusion cu a wordo causa pa e propio abogadonan di e personanan en cuestiona, caminda segun STA, a sconde cierto informacion pa e sindicato. Awor cu e informacion a sali na cla, ta mira cu no tin ningun motibo pa bay accion. “Si nos tabata sa di esaki prome cu nos a declara cu nos ta bay accion, lo nunca nos a haci e declaracion ey tampoco y nunca nos lo a prepara pa bay guera” de Cuba a finalisa bisando. Como tal e accion ta para. 

MENASA

Tabata diamars cu sindicato a menasa cu lo por tin accion diabierna ultimo unda cu por a pone Elmar plat. Asina e presidente di e sindicato Diego de Cuba a confirma na NoticiaCla diamars anochi. “ Carta a bay pa ELMAR mayan pa pone  dos empleadonan cu ta geschors back na trabao den 24ora sino e empleadonan ta dal abao” De Cuba a bisa. Si esey no pasa, lo a pone e compania plat, cu consecuencia cu por a kita coriente. E promer motibo pa schorsing di e trahadornan tawata fraude y awor ta conflicto di interes. Pa ambos, segun de Cuba, no tin notibo pa e schorsing. Awor e accion ta cancela.