Cambio grandi di reforma fiscal ta keda introduci te januari 2020

ORANJESTAD – E cambio di mas grandi pa loke ta e reforma fiscal di bay di impuesto directo pa indirecto lo tuma lugar 1 di januari 2020. Esey ta practicamente e unico cos concreto cu e mandatario encarga cu finanza Xiomara Ruiz por a bisa durante un conferencia di prensa diahuebs mainta. Mes momento el a sigura cu aki dos siman gobierno lo anuncia un serie di decision mas chikito tuma cu por drenta na vigor pa 1 di januari 2019. Ta premira cu pa prome cuartal di aña 2019, lo anuncia algo mas concreto y grandi cu por yuda mitiga e impacto di e actual crisis heffing mitar di 2019.

BTW SIMPLIFICAManera ta conoci International Monetary Funds (IMF) a yuda gobierno cu e parti di reforma fiscal, y a duna como conseho pa bin cu un tipo di BTW (Belasting over de Toegevoegde Waarde) simplifica, mientras cu otro stakeholders a haci mencion di e asina yama OB (Omzet Belasting) lo ta e forma mas miho pa implementa na Aruba. Sinembargo e posibilidad cu gobierno anterior a bin cu ne como un posibilidad, esta ABB (Algemene bestedings belasting) ta bari for di mesa.