Fraccion MEP kier minister duna cuenta na Parlamento riba seguridad na frontera

ORANJESTAD – Fraccion di partido MEP a pidi minister di husticia bin Parlamento bin duna cuenta na Parlamento riba e tema di seguridad na nos fronteranan. Lider di fraccion Rocco Tjon a manda un carta pa e mandatario pidiendo un ‘openbare bijeenkomst’ riba e tema. Segun Tjon, minister di Husticia a informa Parlamento na varios ocashon riba desaroyo pa loke ta illegalidad y su aspecto di seguridad. Sinembargo, mirando e ultimo sucedidonan,  Tjon ta haya importante pa debati riba e aspectonan aki durante un transmision publico.

INFORMA

Specificamente a solicita e Minister pa bin Parlamento y informa Parlamento riba (1) su maneho preventivo pa frena e desaroyo actual (2) e controlnan na nos fronteranan y (3) e lasonan di trabou entre e departamentonan local y e departamentonan cu Marina Real.

META DI E DEBATE

E meta di e debate ta pa informa pueblo debidamente y yega na un formula pa frena e desaroyo actual. Specificamente kier debati tambe riba con Marina Real por wordo utilisa pa yuda den e situacion aki. Semper teniendo na cuenta e "gezagsrollen", "info-positie", "bevoegdheden y verantwoordelijkheden". No ta conoci ki dia e reunion ta tuma lugar.