Eddie de Veer a celebra 30 aña di aniversario cu MetaCorp N.V.

ORANJESTAD - Eduard L.J. de Veer, cariñosamente conoci manera Eddie, ta celebrando 30 aña di aniversario cu e compania MetaCorp N.V. Un pionero y visionario den e mundo di comercio local, cu semper a enfatisa cu e empleadonan ta e ‘asset’ di mas importante di tur compania. Eddie awor ta celebrando un trayectorio largo y productivo su tras cu un di e empresanan comercial di mas bieu na Aruba.

Rondona por medio di su famia  y coleganan di trabou, siman cu a pasa sr. Eddie de Veer a celebra un trayectorio bunita di 30 aña cu MetaCorp N.V. Mirando atras e ta bisa cu si e lo tabata tin e oportunidad pa cambia algo 30 aña pasa, e no lo cambia absolutamente nada.

“Oficialmente e ta 30 aña riba payroll, pero Eddie a cuminsa traha cu e compania aki for di mucha chikito. Ki chens cu tabata tin, sea ta weekend of vacantie di scol, Eddie tabata trahando”, sr. Eduardo de Veer ta bisa. Eddie a traha tur caminda: riba dak, den garage , riba truck, y loke ta resalta di Eddie ta su empeño pa traha sin ningun miedo di trabao y logra su metanan. “Pa mi como tata ta mas importante ainda cu su caracter cu su coleganan semper ta den bon actitud pa trabou, e ta un bon tata, un bon yiu, un bon hende. Anto eseynan ta resalta pa mi”, segun sr. Eduardo de Veer.

Eddie tin un trayectorio largo di trabou y experiencia su tras, cumisando cu un bachelor den ciencia Electronical Engineering 1991 gradua na Merrimack College na Merca. Na aña 1988, Eddie a cuminsa cu su prome reto como manager na De Veer Theatre N.V. Eddie a continua cu su desaroyo trahando na tur otro companianan socia di MetaCorp manera, Managing Director y otro posicionnan. Na 2009, Eddie tabata encarga cu e maneho di operations di MetaCorp Curacao. Y na 2015, Eddie a bira CEO y President di MetaCorp N.V. unda el a cuminsa dirigi EcoTech, ATCO Aruba, New York Laundry, ATCO Concrete, EcoGas, Tropical Bottling Company of Aruba N.V., Brouwerij Nacional Balashi N.V. y The Cinema.