Goedhoop: AZV tin cierto duda riba concepto proponi di AruBig

ORANJESTAD – AruBig ta e concepto cu ta regula con ta acepta studiantenan cu a studia medicina den otro region cu no ta p.e. Hulanda, basa riba e nivel di estudio. Den su prome entrevista cu NoticiaCla desde cu el a bira director, Ruben Goedhoop  a splica e pensamento di AZV riba e tema aki e siman aki. . 

PARCIALMENTE DI ACUERDO

A resulta cu AZV ta di acuerdo riba varios punto presenta pa loke mester bira e Arubig, pero cu  riba varios punto AZV tin un otro punto di salida. Esaki no kier men cu nan ta contra, pero nan tin cierto duda y pregunta riba cierto parti di e concepto proponi.  AZV ta di acuerdo cu algo mester wordo haci pa e asunto di registro di docternan local cu a studia den nos region. E asina yama ARUBIG issue. Segun Goedhoop, e punto ta cu e calidad di cuido (medico) cu bo por spera na fin di dia ta e cos mas importante cu tin. Esey no ta negoshable. 

CALIDAD CONFIABEL

Segun Goedhoop, unda cu un persona por a studia, sea ta na Merca, Hulanda of den region, con nos sa como AZV si e calidad di e estudio ta riba e mesun nivel. Esey ta henter e punto di discuscion segun e director nobo. No tin nada contra e personanan cu a bay studia na e varios areanan, y esey no kier men cu Hulanda ta esun di mas miho pa loke ta cuido medico segun Goedhoop. Tin un cuido di cierto calidad na Aruba. Si un hende bin cu un estudio medico di otro pais, e mester ta por lo menos riba e mesun calidad of mas halto.  

KEDANDO CLA

Mientrastanto, gobierno na augustus a presenta e informacion cu ta kedando cla cu e concepto di AruBig, unda cu studiantenan local dentro di poco por  bay studia medicina den region y traha bek na Aruba sin problema. Minister di Salud Dangui Oduber a splica e tempo ey cu despues di un periodo di evaluacion y reunion, un comision extenso a presenta un solucion cu a keda acepta y cu lo funciona y haya e nomber ARUBIG, manera esun di Hulanda (BIG). Esey ta e forma di acredita un persona cu a studia medicina, y permitie traha na Aruba como docter. Te cu awor, esnan cu kier studia y traha como docter na Aruba, mester ta registra via BIG di Hulanda. 

SOSTEN AMPLIO

Segun Oduber, e intencion tabata pa e comision haya un sosten amplio (draagvlak), y esey despues di varios reunion, a sosode y a logra tambe pa haya e consensus ey. "Na e momento aki, bo ta drenta e registro, door di BIG di Hulanda" Oduber a recorda. Pero awor ta bay haci uso di e organonan di Costa Rica, Colombia y Merca. "Na momento cu un universidad ta wordo acredita den un di e paisnan aki, esaki ta trata specialisacion di mediconan, na e momento ey bo ta wordo acepta den e registro di Aruba" Oduber a sigui splica. Aruba ta bay tin pues su propio registro, ARUBIG.

CALIDAD

Banda di esaki ta bin un instituto di calidad unda cu cada pasa algun aña, bo mester sigui curso pa bo mantene e nivel.