Wever: Si STA ta responsabel, e no ta recuri na sembra panico

ORANJESTAD – Gobierno di Aruba lo duna instruccion na directiva di NV Elmar hunto cu e accionista (Utilities) pa tuma accion relaciona, cu e menasa di un posibel accion diabierna awor. Asina Prome Minister Evelyn Wever a bisa NoticiaCla diamars anochi. “M’a djis bisa nan, pa nan prepara un kortgeding, pasobra esaki no ta motibo pa kita coriente y Gobierno lo no tolera un acto asina iresponsabel” Wever a sigui bisa e portal aki. E mandatario a reacciona asina na NoticiaCla, despues di a tende di e intencion di sindicato STA y despues sindicato Alvast. 

REUNION

E mandatario a sigui bisa cu otro siman e tin un reunion regular planea cu e sindicato. “Un afspraak cu mi tabata tin traha basta tempo caba, pa mi scucha sindicato” e mandatario a bisa. “Si nan (refiriendo na sindicato STA:red) ta serio y responsabel, nan no ta recuri na sembra panico. Si di berdad nan lo kier discuti esaki cu mi, nan lo warda pa nos bespreek e y no manda menasa via prensa” e mandatario a sigui bisa. “ E gobierno aki ta un gobierno serio y drechi. Nos ta un gobierno responsabel y nos ta exigi di nos partnernan - mi ta considera sindicato un partner - cu nan tambe ta demostra seriedad y responsabilidad” Wever a finalisa bisando.