A yega di deporta un di e victimanan ilegal na Santana di Cacho dos biaha caba

ORANJESTAD – Un di e dos personanan Venezolano ilegal cu a wordo haya morto diasabra na Santana di Cacho, ta un hoben di 25 aña cu no ta un desconoci na Aruba. De hecho, el a bishita Aruba 3 biaha caba den e ultimo dos añanan di cual 2 biaha el a keda deporta. Un biaha cu prohibicion pa e bolbe den 2 aña y e otro cu prohibicion den 5 aña. Asina mes, Johnny Perozo Bracho a opta pa laga su casa y yiunan atras na Venezuela diabierna y subi e boto 5’or di atardi rumbo pa Aruba. E boto a yega berdad algun ora despues, pero Bracho ta esun cu nan a haya ta drief den laman, sin bida. E otro victima, Wildredo de Jesus Vilela Marrufo ta esun cu nan a haya na tera. 

AYUDO LOCAL

Loke a resulta ta cu e personanan aki, manera prome minister Evelyn Wever a bisa caba diasabra den conferencia di prensa extra ordinario, tabata hendenan cu ya ta conoci na Aruba y cu tabatin hendenan cu tabata yuda nan cu estadia y trabou. Bracho mes, por ehempel,  a wordo bisa pa un contratista local pa regla su papelnan y di su famia y e lo a dune trabou como ‘voorman’ na Aruba. Ademas tabatin amigonan cu tabata sper’a su yegada y tabata pendiente pa cu su estadia. E yamada a bin cu el a yega berdad, pero cu el a yega morto. Asina su mama Marbella Bracho a bisa, cu a bin Aruba cu e ruman, pa haci tramite pa traslada e curpa pa Venezuela pa entiero. E amigonan na Aruba, unabez di tuma nota di e tragedia, a acudi na autoridad y a identifica e curpa di Bracho.