Sentimentonan mixto pa cambio di gobierno na Fishermans Hut

ORANJESTAD – E sentimento pa loke ta e cambio recien cu gobierno a impone na e sitio na Malmok, specificamente Fishermans Hut, ta uno mixto. Ta trata di re-alocacion di operacion acuatico conforme e beach policy na vigor. Algun ta considere algo negativo y ta stroba Aruba di ta un mecca di deporte acuatico, mientras otronan ta mas positivo, y no ta haye algo malo.   . Entre esnan cu ta publico riba e tema ta e actual propietario di un negoshi di windsurf eynan, Wim Eelens y un otro persona cu pa hopi aña tabata encarga cu Aruba Hi-Winds, e conocido docente  Evert Bongers. E ta menos positive cu e cambio. 

E CAMBIO POSITIVO

Recientemente gobierno a informa tur operador di windsurf y otro deporte acuatico na e area ey cu mester re-ubica nan mes  pa por duna mas espacio di beach pa publico. Eelens como un di esnan afecta, a ‘obedece’ y a mustra NoticiaCla cu esaki (e cambio)  no ta algo nobo ya cu pa añanan a papia riba dje. Y e por tin bentaha den largo plaso pa e negoshinan y e area. E unico cos ta cu e lo a aprecia cu gobierno lo a duna nan mas alerta prome cu haci esaki di un dia pa otro. E plan berdad tabata conoci pero e orden di ‘implementacion’ a bin ‘diripente. Y esey si Eelens tabatin problema cune, pero a sa di biba cune. 

ARUBA ACTIVE VACATIONS

Eelens ta opera e school di windsurf Aruba Active Vacations y ta afecta directamente cu e paso aki. Segun Eelens, el a duna oido mesora na e mudanza. Pa aworaki mester a hala su operacion mas atras cu container, pero ta premira cu dentro di poco tempo e area lo ta mas miho y nan tambe lo ta cla cu nan ‘set up nobo’. E ta contento y ta considera e plannan di gobierno como un ‘upgrade’ e area. Segun Eelens e ta ‘di acuerdo’ y ‘ e area lo bira hopi mas bunita’ unabez cu e ta cla. E mes ta kere cu den cuestion di 2 siman, su operacion mester ta mas structura na e area nobo tambe. 

HI-WINDS

Fuera di tin su school di windsurf, Eelens ta e actual presidente di Aruba Hi-Winds, un evento annual di windsurf, cu a cuminsa 32 aña pasa (1986) na man di dos Arubiano Ruben Croes y Anthony Blok. Pa hopi aña otronan a tuma esaki over y despues di Evert Bongers, awor  Eelens ta na timon di e evento aki. E evento aki aña pasa caba a conoce su prome ‘obstaculo’ ora cu a bira conoci cu gobierno no tabata permiti ‘mas’ pa pone ekipo riba beach. “Nos mester a custumbra” Eelens a bisa. “El a hinca nos den un challenge for di aña pasa caba, y e no ta facil” Eelens a sigui bisa. 

CRITICA 

Bongers, cu pa hopi aña tabata encarga, a vocifera su opinion riba su pagina personal di Facebook, considerando Aruba Hi-Winds como e prome victima na juli, ‘ora cu e tabata forza pa pone tent y trailer riba e parkinglot cu 4 dia di notificacion”. Ademas Bongers a mustra su preocupacion pa cu e situacion actual. “Awor scolnan di windsurf y kite (surf) mester move mas leu di e awa, debi na regla di gobierno.Danki gobierno, polis, DOW” Bongers ta continua, E ta mustra cu esnan trahando duro pa haci Aruba e mecca di deporte acuatico, ta strobe pa autoridanan. “Mi a kere cu nos tabata suppose di colabora den promove nos isla, pero mi tabata robez” Bongers ta finalisa bisando.  

REUBICA

Den un declaracion na NoticiaCla, e mandatario encarga esta Otmar Oduber (infrastructura), e cambio ta pa asina cumpli cu e beach policy implementa algun tempo atras. “Awor tin mas espacio pa hopi mas beach pa esunnan cu kier bay recrea cu nan famia na Malmok” Oduber a bisa diahuebs riba su pagina di Facebook. A mustra cu algun trabou ta tumando lugar na Fishermans Hut unda cu a hala tur e trialernan di e windsurfers nan. DOW a hala nan mas leu for di e beach creando mas beach y mas santo blanco cu por cana y recrea. “E kitamento di e trailernan ta parti di e beach policy” Oduber a sigui bisa. “ Aki por mira cu no ta kita beach for di e comunidad pero ta duna mas espacio pa tin mas beach awor na Malmok banda di fisherman's hut. E cantidad di trailer a keda mescos, ta solamente a halanan mas patras pega cu e muraya di turtuga, serca di e parking lot” e mandatario a sigura e portal aki. Potret cortesia www.arubabound.com