STA: Personal di GNC no a actua robez den caso di coach di deporte

ORANJESTAD – Sindicato cu ta representa e trahadonan di Guarda Nos Costa, GNC, esta STA, no ta di acuerdo con ta actuando publicamente den media cu e actuacion di nan miembronan recientemente. NoticiaCla a ricibi un comunicado, cu ta demostra e malcontento di e miembronan. “Nos di sindicato STA a tuma nota di sucedidonan weekend pasa na unda actuacion di trahadornan di Guarda Nos Costa (GNC) a wordo poni den mal luz” e mensahe ta cuminsa na bisa. E ta bisa tambe cu STA ta admira con dia aden y dia afo personal di GNC ta trahando pa bienestar di pais Aruba. “ Despues di basta añas porfin GNC ta haya atenshon di gobierno y cosnan ta canando bon. Pesey ta mas di lamenta cu riba rednan social GNC ta wordo poni como inhumano unda ta trata di e caso di e maestra di gymnastiek”. STA a mustra cu nan kier a aclarea un que otro. “Pa cuminsa STA no ta mete den decisionan tuma door di minister of huez.  Semper GNC ta reaciona riba señalnan concreto di ilegalidad”. A sigui mustra cu GNC ta actua y procede conforme cu tur leynan exsistente. Segun e comunicado, den e caso concreto aki, GNC a opta pa bay como civil pa constata si e maestranan ta trahando mientras cu nan ta ilegal. Constatando esey y den tur calmo pa banda di GNC a purba di translada e dos maestranan. “GNC no por wordo poni responsabel pa actitud di un di e maestranan dilanti di su alumnonan”. E resto ta conoci segun e sindicato. Un maestra a admiti cu e tawata traha illegal a wordo deporta.  E otra maestra a haya permiso pa keda.  STA a ricibi hopi reacion di su miembronan na GNC cu nan no ta contento con nan ta wordo poni y a base di esaki, a opta pa reacciona, segun su presidente Diego de Cuba a bisa NoticiaCla