Cantidad di ilegal deteni diasabra a bira 7 y curpa di dos haya morto, ta identifica

Posted on 10/22/2018 10:28 am AST | Updated on 10/22/2018 10:40 am AST

ORANJESTAD – E curpa di e dos personanan ilegal cu autoridad a localisa diasabra mainta na Santana di Cacho, a keda identifica. Asina NoticiaCla a confirma pa su fuentenan dialuna. Un di nan a spula yega tera, y e otro tabata drief ainda den awa. Ambos diasabra no tabatin ningun tipo di identificacion riba nan. Pero ya caba nan a keda identifica. Ademas NoticiaCla a confirma cu na tur, te cu awor, autoridad a logra gara y detene 7 persona, cu ta 4 mas cu inicialmente polis a raporta diasabra. E investigacion mientrastanto ta continua riba e caso lamentable di diasabra marduga/mainta. 

E CASO

Manera NoticiaCla a raporta anteriormente caba, tabata diasabra marduga pa 3:55 ci unidad di kust surveillance durante patruya a topa cu un boto na altura di Santana di Cacho. A pidi di biaha pa asistencia di patruya di San Nicolas . Tambe polis maritimo a presenta pa duna un man y kustwacht. Despues ta logra detene 3 ilegal (despues a bira 7) no mucho leu di e sitio di e sucedido. Kust surveillance un rato despues ta bin topa cu un curpa sin bida no mucho leu di unda a haya e boto. Pa 7:15 dr Texier ta constata morto. No a haya niun identificacion di e persona masculino sin bida . Ta pidi pa helicopter di kustwacht y na unda durante un buskeda nan a señala un curpa sin bida den lama . Ta trese e curpa tera y na unda dr Texier ta constata morto pa 8:45 di un otro ser masculino cu tampoco tin identificacion riba dje. Departamento technico a yega na e sitio tambe pa asina hasi nan investigacion. Slachtofferhulp tambe a wordo poni na altura . Despues patruya ta bin topa cu un persona mas den colony y ta bay over na detene y asina pase pa personal di GNC. Potretnan cortesia 24ora.com

 

  • Zulo
  • Powered by SETAR