Seguridad di CMB a sigura ATM na Boulevard y pone den lockdown

ORANJESTAD – Seguridad di CMB a sigura nan ATM na Boulevard y pone den lockdown den fin di siman. E noticia di skimming di un ATM di e instituto financiero Caribbean Mercantile Bank den fin di siman tin tur atencion di e banco. Asina e banco a informa diadomingo pa medio di un comunicado. Segun e banco, durante dia ayera nan seguridad a haya notificacion electronico for di e ATM na Boulevard cu un “skimming device” a wordo detecta na e machine.

LOCKDOWN

Den menos di 30 seconde e machine automaticamente ta bai den lock-down y no por haya acceso mas na esaki pa haci ningun tipo di transcaccion. Den menos di 3 minuut patruya di seguridad di CMB tabata presente y a kita e “skimming device” for di e machine.

VIDEO CU TA CIRCULANDO 

Es mas den e video cu ta circulando riba Internet (cu ta mira un of mas persona na e ATM), ta personal di seguridad a filma esaki pa uso interno y pa comparti cu otro banconan y autoridad, segun e comunicado. “ Absolutamente ningun cliente a wordo afecta pa e intento di “skimming” aki”.

ANTI SKIMMING 

Mientrastanto, e ATM na Boulevard lo keda riba lock-down te ora cu lanta e machine bek den transcurso di dia. Un bes mas nos kier sigura nos clientenan cu tur ATM di CMB ta ekipa cu sistemanan automatisa di “anti-skimming” y cu nos expertonan di seguridad ta patruya y vigila tur nos localidadnan constantemente.