Presidente di Camara di Comercio Ernst Mohamed a entrega su retiro

ORANJESTAD – Den un anuncio di sorpresa pa hopi hende, conocido comerciante Ernst Mohamed a anuncia su retiro como president di Camara di Comercio. Motibonan cu el a duna durante un evento social na KVK diabierna atardi laat, tabata personal. Mas specifico, cu e mester su tempo completo pa lanta un negoshi nobo proximamente. A gradici miembronan di su famia y di board pa e sosten cu el a haya. No a bisa ken ta reemplaza Mohamed, pero mas sigur lo ta e directiva y e vice presidente. 

CONFLICTO

Tabata comienso di siman cu Camara di Comercio tabata den noticia ora cu nan a comunica cu nan ta sostene e asunto di cobransa di sushi door di Serlimar. Cos a bira ‘interesante’ ora cu minister encarga cu Serlimar a bisa publicamente den un conferencia di prensa cu e presidente di KVK no tabata na altura di e comunicado cu e gremio commercial a manda. A indica te hasta cu por tin un diferencia di opinion entre e miembronan di e directiva. Como tal e pregunta a surgi diabierna si e motibo di e retiro no tabata relaciona cu e diferencia aki, y pakico no a warda pa e proximo eleccion. Mohamed a sigura cu esaki no ta e caso y cu e mester a bay mucho mas prome, pero a pidie pa wanta y tempo no tabata corecto. Ademas el a bisa cu e tabata na altura di e comunicado y no sa di unda e informacion ey a bin di minister. "Mi no ta bisa cu minister ta gaña" Mohamed a bisa, y a sigura cu e tabata na altura di e comunicado.