Un Arubiano y un Yiu di Corsou lo topa otro den Serie Mundial MLB

BOSTON – E aña aki, e weganan di Serie Mundial di baseball Grandes Ligas na Merca, tin un toke special. Awor cu e ekipo di Boston Red Sox a gana e derecho pa representa liga Americana, ta un garantia cu ken cu gana e derecho pa representa liga Nacional, cu lo tin un yiu di Corsou ta topa un Arubiano durante e serie otro siman. E Arubiano Xander Bogaerts di Boston Red Sox, lo topa sea Kenley Jansen di Los Angeles Dodgers of Jonathan Schoop di Milwaukee Brewers. E dos ekiponan ultimo ta topa otro pa dicidi cua di dos ta topa Boston otro siman diamars na Boston. E ta algo unico y ta haci e serie mas interesante tambe pa fanaticonan di tanto Aruba y Corsou. 

BOSTON

Boston ayera nochi a sobrepasa tur obstaculo ganando di Houston Astros, e ganadornan di Serie Mundial di aña pasa. Prome cu esey, nan a gana nan rivalnan di tur tempo New York Yankees. Den ambos serie, nan tabata poni como e ‘underdog’, pues no e favorite. Pero Boston a haci lo imposible y a gana di un forma convincente di tur dos ekipo pa duna nan e derecho pa representa liga Americano. Xander Bogaerts tabata sublime den mayoria di su presentacionan, unda cu varios wega ta su presentacion tabata clave pa e Victoria.