M.O.U. pa Bahia Principe na San Nicolas ta firma

SAN NICOLAS – “ E lo no ta facil. Leu di e zona turistico, pa traha un hotel grandi aki. Pero mi ta priminti boso cu San Nicolas lo tin un di e miho hotelnan di Caribe”. Na palabra e doño di e consorcio y concepto Bahia Principe Don Pablo Pinjero , na occasion di firmamento di e Memorandum of Understanding MOU, diahuebs anochi na San Nicolas, pa construccion di e prome hotel pa San Nicolas. A usa e evento cultural "Carubbean Festival" como lugar central simbolico pa firma e MOU. Apenas dos ora na Aruba, Pinjero a duna su promesa cu siguridad cu e tin e placa, e conocemento y e forma con pa pone e hotel na Aruba. “Loke mi mester di Aruba, ta e permisonan lihe pa mi por cuminsa traha pa caba” Pinjero a bisa cu un sonrisa riba su cara.

Ora cu Pinjero a referi cu San Nicolas ta haya un di e miho hotelnan na Aruba, e la sigura cu esaki ta ‘den cantidad, den calidad y den hende’. “ Y ora cu e hotel ta cla, boso lo mira ki clase di hotel esaki lo ta na Aruba” Pinjeroa sigui bisa. Di otro forma, e la bisa cu enberdad e tin e reto pa cu e lugar, mirando su localidad. E hecho cu e hotel ta uno basta leu ubica, ta pone cu pa hacie atractivo, mester percura pa inverti den e restaurantnan y ubica nan strategicamente pa evita cu hendenan ta bay ariba bek, unabes nan baha unda cu e hotel ta ubica. Pa por sigura un clientela sigura cu ta funciona cu e tipo di all inclusive, lo uza e nivel di mas halto cu e hotel conoce. Segun Pinjero a splica, e lo uza e nivel di mas halto di e clase di hotel di e grupo na San Nicolas, cu ta “Luxury Bahia Principe” di Don Pablo Collection. E ta un nivel halto cu ta bendiendo bon.

Loke a hala hopi atencion ta e hecho cu e hotel kier emplea un cantidad record di trahado. Por lo menos 1000 trahado e hotel ta rekeri, pa por tin e nivel di servicio cu e ta conoci pe. Pa cada huesped, ta pone por lo menos 2.1 trahado, pues e nivel ta pone cu mester di basta trahado. “Nos lo duna empleo fiho na 1000 famia. Esey ta importante. No kier cuminsa pa caba, y ta spera cu enberdad na februari nos por cuminsa cu e construccion y 1 anja y mey despues, habri e hotel”.