Daal: Contract entre Cruz Cora y UNHCR a termina na September

ORANJESTAD – E contracto cu Cruz Cora di Aruba tabatin cu UNHCR a termina na September. Asina e president di Cruz Cora Aruba Stephen Daal a bisa den e conocido programa “Entrevista di Dia” na e radio emisora Hits100.9 FM. Aki Daal a revela e.o. cu nan contract cu UNHCR, cual ta un division di asistencia pa asilo di United Nations a termina na luna di September ultimo. Por corda cu recientemente tabatin critica cu via Cruz Cora tabata otorga documentonan na ciudadanonan Latino (Americano) relaciona cu asilo politico. E asunto a bira un problema unda cu recientemente gobierno di Aruba a reuni cu UNHCR na Nacionan Uni na New York unda cu UNHCR a priminti cu esaki lo no sosode mas. Gobierno di Aruba a keda di reuni cu Cruz Cora Aruba riba e tema segun prome minister Evelyn Wever a bisa e tempo ey. Bek pa Daal su entrevista, el a enfatisa ademas  cu riba e temanan aki Cruz Cora no ta comenta mucho, awor nan ta concentrando tur nan atencion riba proyectonan importante pa comunidad manera “No Sconde Mas” cual ta un proyecto social realisa hunto cu Kiwanies. Tambe e aña aki Cruz Cora a participa hunto cu Fundacion Hospice Atardi den e proyecto di “Hospice”, cual ta un instancia nobo di cuido crea pa duna asistencia na esnan cu ta den un estado di salud terminal. Sr. Daal a informa tambe cu ainda nan ta brindando asistencia keto bay na St. Maarten. Mas di 75 boluntario a participa durante di un periodo di mas cu un aña. IRMA tabata un di e peor horcanan cu a yega di azota Caribe den su historia. Na final di e programa e presidente di Cruz Cora a informa cu pronto nan lo ta realisando accion di recauda fondo y nan ta spera di por conta cu e apoyo di comunidad. Na inicio di otro aña pueblo di Aruba por spera un proyecto nobo y hopi beneficioso pa comunidad.