Valero: Preparacion a cuminsa pa desmantelacion di e refineria

SAN ANTONIO – Preparacionnan a cuminsa caba pa Valero, pa un posibel desmantelacion di e refineria, si ta necesario. “Mas paso lo wordo tuma prome cu e decision final cay na fin di 2015” vocero di refineria Valero a bisa NoticiaCla.com diahuebs mainta. Manera cu NoticiaCla.com a raporta anteriormente caba, Valero ta den proceso pa desmantela e refineria basa riba e acuerdo sera cu gobierno na 2012. Esaki ta bisa cu unabes cu e refineria no ta opera mas como un refineria y tin un reduccion di personal, cu dentro di 3 anja di tempo, si no bende e refineria, cu lo desmantela esaki. E periodo ta vence na fin di 2015.

Diahuebs mainta, e vocero a confirma e noticia di NoticiaCla.com di algun siman pasa,  cu a cuminsa enberdad cu e proceso pa desmantela e refineria. Entre nan, a cuminsa solicita informacion di companianan cu lo por ta interesa pa haci e trabou grandi aki. Unabes cu nan tin e informacion (datos) di e companianan, nan ta haya un invitacion pa participa den un destaho, unda cu ta scohe e compania ganador pa esaki. Y e proceso aki ta loke cu NoticiaCla.com a raporta recientemente. “Enberdad esaki a cuminsa” Day a bisa.

Si ta necesario y finalmente e decision cay, (den 2015) e refineria lo implementa e plan y cuminsa cu e proceso di desmantelacion pa fin di 2015. “E lo ser haci den un periodo lihe, sigur y responsabel. Pero mientrastanto Valero lo sigui busca un cumprado pa e planta” Day a bisa. Un benta, ta sigui ta e miho opcion segun e vocero.