Segun hobenan, ta facil pa cumpra droga y arma na Aruba

ORANJESTAD – Na Aruba ta facil pa haya droga y arma cumpra. Ta placa mester. Asina algun hoben di apenas 15 aña a bisa conocido comerciante y deboto religioso Atan Lee recientemente. Den un post di su pagina di Facebook, el a comparti su preocupacion pa cu e situacion di criminalidad, un dia despues di e asesinato di e conocido ciudadano Harmon Girigorie. Lee ta splica entre otro con algun tempo el a bay reza cu hobenan den KIA y a envolve den un combersacion cu e tema cu a sorprende, pero cu ta confirma e realidad cu tin na Aruba relaciona cu criminalidad y nos hobennan.  

E COMBERSACION

Lee ta splica cu el a papia cu e hobenan aki y e contesta riba e preguntanan a sorprende Lee.  “ Mi a puntra nan na unda nan ta haya arma y droga cumpra, y un di nan a contesta mi, tur caminda, ta placa mester pa cumpra” Lee ta conta. “ Un hoben di apenas 15 aña. E ta pertenece na e grupo cu a atraka e taxista banda di e hotelnan. Esaki a sosode durante e Gobierno anterior” Lee ta sigui conta. Cu esaki un biaha mas ta confirma con facil ta pa haya arma y droga cumpra riba nos isla. Kiermen cu Aruba ta pesta di droga y arma y ta facil pa cumpra un. Rumannan si sigui asina nos lo bira mescos cu e islanan den nos region y paisnan, na unda crimen ta na ordo di dia.

MANEHO DI GOBIERNO

Algun dia atras, minister di husticia Andin Bikker a sigura cu e ta trahando pa resolve e problema di criminalidad na Aruba, y a pidi pueblo pasenshi pa por logra esaki. Mes momento a bisa cu ta trahando riba un plan cu tin cu funciona, pero cu tin algo awor caba cu ta usando y cu ta dunando resultado mesora. Cu e punto di ciudadano Lee mientrastanto, un persona conoci den comunidad, ta mustra cu pueblo ta sigui hopi preocupa cu e situacion. NOTA: E potret ta uno generico y no necesariamente uno actual di Aruba y ta cortesia di FOX13 Memphis