Ministerio publico a dicidi di apela sentencia di caso de Vuyst

ORANJESTAD – Ministerio publico a dicidi pa apela e sentencia den caso Fist (asesinato na de Vuyst), ya cu nan no ta di acuerdo cu e sentencia. Den e caso, ministerio publico a pidi bida largo pa e sospechoso Chalgut, pero debi na circumstancianan, huez a dicidi pa duna e sospechoso ‘solamente’ 20 aña di castigo di prison. Segun vocero di ministerio publico Ann Angela, “ e motibo ta cu OM a exigi principialmente bida largo como castigo maximo. Huez a mantene un otro cualificacion y pesey a yega na un otro castigo maximo. Dus ey tin un diferencia, esta, den e haltura di e castigo maximo”. Esey kier men cu e caso lo keda trata di nobo, cu consecuencia cu e caso por haya un otro buelta. 

E CASO

E unico sospechoso den e caso di asesinato di de Vuyst (3 november 2017), J. Chaljub a keda sentencia na 20 aña di prison algun siman pasa, scapando asina di e sentencia solicita pa ministerio publico di bida largo. Motibo di e ‘reduccion di castigo’ segun huez, ta cu no por a deduci e motibo di e sospechoso pa a comete e crimenan, y ni kico e relacionan tabata di e crimenan cometi pa Chaljub. 

SITUACION

Chaljub a desmenti di a comete e actonan, y como tal corte mester a basa e hechonan unicamente riba e pruebanan forensico presenta. Tin varios scenario posibel cu por a conduci na e crimenan, pero e hecho cu e sospechoso a keda keto, y nenga su culpabilidad, ta pone cu corte no por haci un escohencia riba un di e posibel scenario. “Pa esey ta necesario pruebanan legal y convincente”huez a bisa. Algo cu awor no tin, segun huez. 

Cu e sospechoso a mata cu e intencion pa facilita e secuestro di e persona y su violacion, manera cu a wordo splica primordialmente, ta posibel, pero segun huez a base di prueba, no por wordo proba legalmente ni convincente. De hecho, huez a sigui bisa, Corte no sa kico e intencion ta(bata) di e sospechoso (pa comete e actonan criminal), kico e relacion ta di e crimenan cometi y kico a tuma lugar . “Cu e sospechoso a comete actonan di violencia cu e meta pa viola e victima, cu despues a bin fayece, por wordo pensa berdad, pero di otro banda tambe no por wordo proba legalmente  y convincentemente a base di pruebanan presenta”. Aki tambe segun huez, Corte no sa kico a tuma lugar y kico e relacion di e crimenan tabata.

VEREDICTO

A base di e pruebanan presenta, huez ta opina cu corte por legalmente proba solamente y convincentemente cu e sospechoso a kita libertad di e victim Sarahi, a viola e victima, y a mat’e. “Segun e Codigo Penal, e castigo maximo di prison pa e caso aki, segun articulo 1:136, ta un castigo di prison di 20 aña” e huez a sigui bisa. 

MOTIVACION

Como motivacion y pa stipulacion di e castigo posibel,  Corte a considera cu e sospechoso a mara un mama hoben den su cas, viol’e y a mat’e di un forma horibel. El a laga e curpa sin bida di Sarahi atras, asabiendas cu e (curpa) lo wordo haya pa su famianan, den e caso aki e ruman muher di 13 aña. Di e heridanan constata na e pols y enkel di e victima, ta parse cu Sarahi lo a bringa pa su bida. E derecho di bida, e derecho mas fundamental cu un ser humano ta dispone di dje, a wordo  kita di dje.  Pa e famianan di e victima, su yiu, mayornan, y su pareha, el a causa tristesa grandi. Nan mester biba cu e tragedia aki pa resto di nan bida. E hechonan aki segun huez, a shock comunidad tambe, y a ‘yuda’ crea sentiment di inseguridad y intrankjilidad den e comunidad Arubano segun e huez. Segun rapport di psicologo, a constata cu e sospechoso ta totalmente conciente di su actonan y responsabel pe, y cu e chens pa ripiticion di e crimen ta halto. Ademas su ‘strafblad’ tambe no ta yuda e sospechoso. Cu tur e puntonan den su contra, y e pruebanan presenta, huez a dicta pues e sentencia di 20 aña envez di bida largo.