Gobierno ta contra KVK su plan pa bin cu impuesto nobo pa recohe sushi

ORANJESTAD – Gobierno ta contra e idea di Camara di Comercio pa impone un impuesto nobo cu tin cu atende cu cobransa di recohemento di sushi, envez di cobra na casnan particular y negoshi. Ta parse cu Camara di Comercio a cambia nan punto di bista pa loke ta cobransa di Serlimar pa recohe sushi. Asina minister di infrastructura Otmar Oduber a indica diamars den un conferencia di prensa. Esaki pasobra mientras cu e gremio commercial ta manda e mandatario un carta cu ta bisa cu ta sostene e idea pa cobra sushi, den un comunicado saca e siman aki, ta laga afor cu e gremio kier pa pueblo paga esaki via un impuesto nobo. Esaki ta parti diun diferencia di opinion grandi cu tin den hunta di Camara di Comercio segun Oduber.  

COMUNICADO 

E mandatario a bisa cu e comunicado cu a keda publica, a laga afor cierto partinan cu ta den e carta cu el a ricibi medio September di e aña aki di e presidente di e gremio esta Ernst Mohamed. Ora cu e comunicado a sali, Oduber a tuma contacto cu Mohamed ya cu e contenido lo a laga cierto cosnan afo cu tabata poni den e carta. Como tal ta mustra cu e gremio a cambia di pensamento. Loke a sorprende Oduber ta cu Mohamed a sigura e mandatario cu e no tabata na altura di e comunicado mes. Cu esaki Oduber ta mustra cu tin un problema interno di comunicacion y entre e miembronan, y cu esaki por ta e consecuencia. 

CARTA DI KVK

Den e carta cu e mandatario a ricibi di Mohamed, y cual carta el a  lesa textualmente pa prensa, KVK ta bisa cu e ta sostene e punto di bista di gobierno pa cobra e gastonan di cobra sushi apart. Cu e comunicado manda dialuna sinembargo, KVK ta contradeci e informacion di e carta. Di otro banda, anto esaki ta loke nan no ta bisa segun Oduber, Camara di Comercio (den e carta pa Oduber) ta papia di introduccion di impuesto nobo cu tin cu wordo cobra na frontera di Aruba ora cu productonan yega Aruba. 

BELASTING NOBO

Segun Oduber, Camara di Comercio tin cu carga responsabilidad pero comercio, cu ta produci gran parti di e sushi, tambe mester por contribui na e maneho (y no e recohemento) di desperdicio di sushi, mescos cu hotelnan. “Kico Camara di Comercio kier? Camara di Comercio ta bisa si, nos ta kere berdad mester paga, contribui pa loke ta trata maneho di sushi, pero bo sa kico, no cobra nos comerciante. Bin cu un belasting y cobra e pueblo atrobe” Oduber a sigui bisa.  Pero esey nan no a bisa den e comunicado segun Oduber. “Nos a bisa nan cu esey no ta aceptabel. Si comunidad ta paga, comerciante por paga” e mandatario a sigui bisa. Scucha e declaracion di Oduber AKI.