Cas di Cultura y DCA a celebra 100 aña conhunto cu un Concierto di Gala

ORANJESTAD – Cas di Cultura y Departamento di Cultura a celebra 100 aña conhunto cu un Concierto di Gala. Tabata bunita pa mira e tarima di Cas di Cultura yena cu talento local y internacional cu a presenta un bunita variacion di musica. 

E mandatario hunto cu e publico a presencia e Concierto di Gala cu a enfoca riba exelencia den ehecucion di musica, musica clasico como tambe riba instrumento di cuerde, canto y canto coral. 

Un tremendo programa hinca den otro cu presentacion di artista- y cantantenan Faritah Luidens, Lili Rodgers, Coro Melange, Piano Duo Johnny Scharbaay y Victor Camacho, Calypso Medley di Beach Lama, invitadonan di Suriname Albert y Louna Arens, Guitar Duo Ivan y Sergio Jansen. Jossy Brokke a presenta “Mi Pais”, Edwin Abath a presenta “Raspao”, un potpourri Tresa Cabayero a keda presenta pa Michelangelo Koolman, C-Zar Olarte y Beach Lama. E anochi di concierto a impresiona cu talento tabata hopi ameno, divertido y interactivo cual sigur lo keda graba den mente di esnan cu a presencia. 

Na final e publico presente por a disfruta tambe di un concierto clasico y alaves moderno presenta pa e cantante di opera profesional Imara Thomas, cu desendencia Arubiano acompaña pa Orkestra y Coro di Cas di Cultura. Imara Thomas ta cosechando fama tanto na Hulanda como Alemania, como prome soprano na ‘Deutsche Oper am Rhein - Düsseldorf’. Nos cantante local Jairo Boekhoudt a acompaña Imara den algun di su presentacion.