Gobierno disgusta cu ehecucion di proyecto Watty Vos Boulevard

ORANJESTAD – Gobierno ta disgusta cu e ehecucion di e proyecto di Watty Vos Boulevard y a informa director di DOW Marlon Croes di esaki. Asina e minister encarga cu infrastructura y consecuentemente DOW, Otmar Oduber a bisa den un conferencia di prensa. E ta culpa gobierno anterior pa a cera un contract cu e grupo aki, di tal forma cu man di gobierno ta  mara pa haci cualkier cambio awor. Un di e motibo di e frustracion di gobierno ta e problemanan na rotonde Codemsa, y e hecho cu man di gobierno ta mara debi na e contracto dificil. Varios problema di awa ta pone cu varios parti di e proyecto actualmente ta bay bou di awa, cu tur su consecuencia. 

CONTRACTO DIFICIL

E mandatario ta considera esaki ‘lessons learned’ di con e proyectonan PPP aki a wordo hinca den otro. E forma con e contracto aki a wordo cera, ta den forma di un solo contracto. “Henter e proyecto ta un proyecto, kier men cu e hendenan tin dos aña y mei pa traha riba henter e proyecto pa entrega esaki” ODuber a cuminsa na splica di e proyecto. No a faseer e proyecto aki pa bisa pa caba cu un parti y despues entregue y sigui cu e otro. “ Esaki ta pone cu ta parse cu bo tin un campo di bataya tur rond di Aruba” Oduber a bisa refiriendo na e situacion caotico cu tin cu santo, caminda habri tur caminda. Ta spera cu na final e ta un bon producto y cu e lo por Alivia trafico. Pero aworaki, e no ta e situacion mas deseable pa nos comunidad. 

DOW NO TA PR DI MOTA ENGIL

“Lamentablente nos no por haci mucho, y mi a notifica DOW tambe” Oduber a bisa. E ta bisa esaki pasobra hende ta wak den direccion di DOW como cu DOW tin den su man pa haci e proyecto mihor. Oduber a bisa e director cu e rol di DOW ta pa exigi di e contratista y laga e comunidad compronde esey tambe, pa haci menos daño posibel na e proceso pa entrega e proyecto aki. “Prome DOW tabata parse un instancia di PR cu ta parti di e construccion. Mi a splica nan cu no” Oduber a bisa. DOW su trabou ta pa controla e trabou, mientras cu e contratista mes ta haci e trabou. Y cu si tin algo robez, DOW tin cu keha e contratista. “Lamentablemente nos no por pone boet pasobra esey no ta hinca den e contracto. Ta te na final por haci esaki” Oduber a sigui bisa.