Serlimar a termina relacion di trabou cu Robin Didder como mgmt team

ORANJESTAD – Management team di Serlimar a keda desolvi dialuna y a pone e director interino na cabez te ora cu e director nobo tuma su funcion. Asina minister di medio ambiente, encarga cu Serlimar Sui Generis Otmar Oduber a bisa den un conferencia di prensa diamars mainta. E conferencia mester a clarifica e noticia di ayera cu a bisa cu e miembro en cuestion, Robin Didder su suspension na Serlimar a keda revoca pasobra loke e tabata acusa di dje, no tabata ilegal. Loke Oduber a clarifica awe, ta cu mientras cu e no ta ilegal, e loke el a haci ta inaceptable y ta kibra e confiansa cu e hunta di supervision y gobierno. Como tal Didder no ta forma parti mas di e management team desde dialuna y a bise cu su presencia no ta rekeri mas entrante ayera mes. 

KICO A SOSODE

Manera ta conoci, algun siman atras Didder a keda suspendi y prohibit pa drenta Serlimar (siendo den funcion como parti di e management team), pendiente un investigacion riba un caso cu nan tabata atende. Didder, contra tur palabracion lo a haya placa paga cu e no tabatin derecho di dje, y a usa e director interno pa firma pa e haya e suma extra di 500 florin pa luna pa su trabou. Esaki tabata contra palabracion haci, unda cu a bisa cu cierto placa paga na e hunta di maneho, no tabata conforme manera palabra. “E miembro tabata sa cu e tabata haya toelage sin derecho”. Ta trata na tur di un suma di 3500 florin cu el a haya extra sin derecho. Segun abogado di Didder, e lo paga tur cos back y a pidi pa e haya su funcion bek. E hecho cu e ta paga bek, ta pone cu e no ta considera e ora como algo no castigabel pero e no por a bolbe su trabou. 

ABUSO

Pa Oduber, loke cu Didder a haci, ta abusa di confiansa di tanto Hunta di supervision di Serlimar y gobierno (e compania ta Sui Generis) y esey ta nifica un kiebro serio di confiansa. A dicidi cu basa riba e abuso di confiansa y e acto cu el a haci, pa desolve su contracto mesora (dialuna mes) pues cu su servicio no ta necesario mas na Serlimar. Lo pague si su ‘ter beschikkingheid’ cu ta caba na November ( e ta docente di profesion), pero lo verreken e suma cu el a haya extra cu no tabata corecto, y mescos lo sosode cu e vacashon cu e tin cu tuma y of haye na placa, pero cu tambe lo wordo verrekend.