Dowers: Gobierno lo no legalisa ningun tipo di droga

ORANJESTAD – Gobierno no ta bay legalisa ningun tipo di droga. E siman aki un biaha mas minister di husticia Arthur Dowers a reitera esaki durante un evento di e fundacion anti droga FADA. Segun Dowers, e gobierno actual claramente ta indica den nan maneho cu nan no ta kere den legalisacion ni liberalisacion di ningun tipo di droga na nos Pais. E maneho ta uno represivo hopi pisa contra droga, pero na mes momento ta considera e aspecto social y e consecuencianan pa personanan cu ya ta den problema, el a añadi.

Minister Dowers a subraya cu gobierno y, particularmente ministerio di husticia no ta para pa legislacion di droga, pero ta bringa droga. For di tempo di ultimo eleccion, tabatin un debate fuerte ora cu un otro partido cu a participa, Red Democratico di Rudy Lampe, a hacie su cabay di campanja, esta legalisacion di droga, particularmente cannabis of marihuana. Gobierno for di e tempo ey a mustra cu nan ta bay linja recta contra e maneho aki, y e siman aki atrobe, a reitera esaki durante e congreso di FADA.

Dowers, presente durante e evento, a pone hopi enfasis den su discurso tocante e importancia di prevencion di adiccion na Aruba. E mandatario a subraya e importancia tambe di e trabao di represion y cu Gobierno di Aruba no ta tolera traficacion y benta di ningun droga. Minister Dowers a bisa cu di un banda e ta satisfecho cu e participacion di diferente instancia importante den e cadena di prevencion, pero di otro banda ta sinta falta di representacion di diferente organisacion cu tambe tin un rol den prevencion y trato di adiccion.

Segun e mandatario, un otro paso cu ta sostene e maneho aki, ta e introduccion di e ley di “preventief fouilleren” pa droga; Aruba ta e unico pais den reino cu tin e ley aki, e minister a comenta. E ley aki tabata efectivo den e proceso pa kita droga for di areanan di scol y otro areanan unda cu hobennan por wordo afecta mas facilmente.” Pa gobierno, prevencion ta un di e aspectonan mas importante pa ataca e problematica di droga. Mas bo haci na prevencion, mas bo por salba y menos costo lo tin na final di dia; mas tempran bo cuminsa mas grandi e chensnan ta cu menos hoben lo cay den droga, Minister Dowers a splica. E mandatario a bisa cu, ademas, ta proba cu mas laat un persona cuminsa experimenta cu droga, menos grandi e chensnan ta cu e ta bira un adicto of un adicto problematico.