PARIS/ORANJESTAD – Aruba a haya un revision positivo di The Organization for Economic Co-operation and Development (OECD) dialuna. Esaki ta nifica cu Aruba no ta bay riba e lista preto di paisnan cu no ta cumpli cu transparencia di informacion fiscal. Pero e tin trabou pa haci si, pa cumpli cabalmente segun e organisacion. Asina e organisacion ta bisa riba su website awe.
REACCION ARUBA
Segun e version official di e forum official publica awe riba nan website, Aruba ta un di e 5 paisnan cu ta ‘obedeciente den gran parti. Dos otro pais ta cumpli cabalmente. Como tal e ta mustra cu minister di finanza Xiomara Ruiz Maduro tabata convincente durante su presentacion recientemente na Paris. NoticiaCla a busca reaccion di prome minister Evelyn Wever, cu en breve a bisa “Mi ta hopi satisfecho cu e logro aki y mi ta felicita Minister di Finansas y henter e team cu a asisti den esaki”.
FORUM GLOBAL
E forum global riba transparencia y intercambio di informacion pa motibonan fiscal ta algo cu OECD ta publica pa mustra cua pais a cumpli y cua no. Si nan no cumpli, nan lo por aparece riba un lista preto, cu ta funesto pa e pais en cuestion. E raportahenan aki ta evalua hurisdicion contra e standard cu ta incorpora informacion di propiedad beneficiario di tur entidad legal relevante y areglo conforme e definicion usa pa e recomendacion di e Financial Action Task Force Recommendations.
E FORUM INTERNACIONAL
Segun e rapport publica dialuna di e global forum di OECD, Aruba hunto cu paisnan manera Austria, Brazil, Saint Kitts y Nevis y Reino Uni esta United Kingdom a cumpli ‘grandemente cu e rekisitonan’. Segun e rapport, “e hurisdicionnan aki a demonstra nan progreso riba hopi deficiencia identifica den e prome buelta di e revision, incluyendo mehoracion di acceso na informacion, desaroya acuerdonan di EOI (Exchange Of Information) mas amplio, y maneho di increment di peticion di EOI, y tambe tuma medida pa implementa e standard fortifica pa cu disponibilidad di doñonan beneficiario”.
RATING DI ARUBA
E forum global a rate Aruba ‘obedeciente pa un gran parti’, durante e period di 1 di juli 2014 pa 30 di juni 2017. E rapport no a bin si, sin su recomendacionan pa Aruba tene cuenta cune. Nan ta inclui entre otro cu Aruba su sistema legal ta rekeri mehoracion pa sigura cu tin obligacion pa mantene e asina yama disponibilidad di doñonan beneficiario, manera rekeri desde cu a fortifica e standard na 2016”. Segun OECD, e preocupacion principal ta cu debi cu tin un cantidad grandi di companianan inactivo na Aruba y tin un vigilancia inadecuado en general, Aruba mester diseña y implementa un supervision eficiente urgentemente, pa sigura disponibilidad di actualisacion y propiedad preciso y informacion di contabilidad pa tur entidad ta den liña cu e standard internacional. Ademas Aruba tin un experiencia limita den contesta peticionan y mester mehora su proceso organisacional mas pa por sigura intercambio di informacion efectivo cu su socionan. Por lesa e rapport completo AKI.
ORANJESTAD – Actual parlamentario independiente mr. dr. Ryçond Santos do Nascimento ta considera su decision pa subi lista berde AVP como un di su erornan cu e la comete den su bida. Asina e parlamentario a admiti na e periodista Tito Laclé durante e programa Noticiacla LIVE diamars anochi. E ta splica esaki den un fragment di e programa.
ORANJESTAD - Cuerpo di bombero temporalmente tin ekipo nobo di maneho. Por lo menos asina minister di husticia Rocco Tjon a anuncia diaranson mainta riba su pagina di Facebook. Esaki despues cu a manda esun cu tabata na cabes, Emilio Geerman cas recientemente. “Awe mainta nos a reuni cu e miembronan nobo di e management team di brandweer. Esaki mirando e ultimo desaroyonan” e minister a cuminsa na bisa.
WILLEMSTAD – Recientemente durante un conferencia cu a tuma lugar na Corsou, diferente partner di salud mental (GGZ) den e Caribe Hulandes a logra adelanto den nan esfuerso pa intensifica e acuerdo di colaboracion titula ‘Dutch Caribbean Mental Health’ y a expresa nan deseao di formalisa esaki den un entidad huridico. Meta di ‘Federatie Dutch Caribbean Mental Health’ ta pa promove calidad di cuido di salud mental riba tur e islanan den Reino. E federacion lo facilita intercambionan di experticio di contenido y e parti organisatorio. Principalmente riba e tereno di calidad, desaroyo continuo, ley y regulacion y educacion.
DEN HAAG - E siman aki cu Minister Maduro di Finansa ta na Hulanda, e mandatario a reuni cu Presidente di CAFT, sra. Lidewijde van Olerongen. Minister Maduro a duna un update riba e trabounan pa mehora maneho financiero di Aruba y a repasa e proceso pa yega na un miembro nobo pa Aruba den CAFT ya cu e termino di sra. Helen van der Wal ta bay yega su fin na augustus e aña aki. E mandatario a combersa tambe riba e reglanan presupuestario y e maneho cu ta wordo traha pa trata cu surplus, ya cu pa basta aña Aruba a conoce solamente presupuesto cu deficit y awo Aruba ta trahando cu presupuesto cu surplus.
ORANJESTAD – Desde awor en adelante, gobiero ta duna permiso solamente pa traha boutique hotel, vs cualkier otro tipo di hotel. Minister Dangui Oduber diamars a anuncia cu a introduci e maneho nobo di otorgamento pa permiso di hotel den cuadro di turismo sostenibel. “E maneho aki ta tene na cuenta cu Aruba no por sigui crece na e velocidad cu e ta bayendo y mester tuma accionan concreto pa frena e cantidad di cambernan cu ainda lo mester construe”.
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.