- AZV: Otro luna tin traspaso automatico di clientenan di dokter Vink pa HOED Piedra Plat
- SETAR a tene su Avigilon ALTA Launch Event cu enfoke riba e futuro di seguridad
- Grupo grandi di ex studiante tin problema pa paga nan Duo lening bek
- CBS: Bestaansminimum a subi atrobe na Aruba debi na aumento di gasto di cuminda
- Figaroa: Proximo gobierno mester consisti di solamente vakministers
AVP y MEP awor den tagana pa informacion usa di Banco Central
ORANJESTAD – Y atrobe tin un ‘tangana’ entre e dos partidonan politico mas grandi di Aruba, AVP y MEP. E biaha aki, ta e asunto di cifras di Banco Central di Aruba (CBA), y si un den un presentacion recien di e lider di e partido berde Mike Eman a usa cifranan real di CBA of si nan tabata fabrica of no. E asunto a haya mas peso diadomingo ora cu diripiente lider di fraccion di MEP Rocco Tjon a produci un carta di Banco Central (dirigi na minister di finanza Xiomara Ruiz), cu ta clarifica cu ‘e graficonan usa den e presentacion di Eman, no ta procedente di Banco Central. Y como tal nan (CBA) no por asumi ningun responsabilidad pa nan. Cu esaki Tjon kier mustra cu Eman lo a usa cifranan ‘fabrica’. Miembro di fraccion di AVP Richard Arends como reaccion na NoticiaCla, ta confirma cu enberdad no ta graficonan di CBA, pero nan propio grafico, pero e cifranan si ta di Banco Central. Pues ningun momento a ‘fabrica cifra’, segun Arends.
TJON
Segun Tjon, recientemente Eman a tene un presentacion pa indica con malo situacion di Aruba ta financieramente, y a usa graficonan supuestamente di Banco Central, pa duna su presentacion mas credibilidad. “Manera ta conoci Mike Eman a usa "grafieknan" pa substancia su ponencia cu no tin crecemento economico. Fraccion di MEP a sospecha cu e grafieknan aki ta fabrica, mirando cu e rapport di Banco Central titula "State of the Economy", publica na 2018, ta indica cu e cremento economico marginal cu Aruba a conoce na 2017 lo continua na 2018” Tjon ta cuminsa na bisa.
PREGUNTA NA MINISTER DI FINANSAS
Segun Tjon, na e momento cu Eman a haci uso di "grafieknan", supuestamente di Banco Central, pa splica cu economia ta malo, fraccion di MEP a manda haci pregunta por escrito na Minister di Finansas pa haya sa den cua rapport e "grafieknan" aki ta publica. Motibo di esaki ta cu e rapport di "State of the Economy" ta indica cu tin crecemento economico na Aruba pa 2018.
CONTESTA RIBA PREGUNTANAN HACI DOOR DI TJON
Sospecho di fraccion di MEP a wordo confirma door di Banco Central, segun Tjon su comunicado diadomingo kier mustra. “ Apesar cu sr. Eman ta usa logo di Banco Central, e "Grafieknan" cu sr. Eman a usa, no ta di Banco Central. Den e carta cu sr.Tjon a ricibi por tuma nota tambe cu Banco Central ta distancia nan mes di e ponencianan cu sr. Eman a trece padilanti durante su conferencia di prensa” e comunicado ta sigui bisa.
CONTROL POLICO
Tjon a sigui splica cu e ta kere cu politiconan tin e deber di controla gobierno, procede na un forma pro-activo pa bienestar di pais Aruba y por ultimo informa pueblo debidamente. Pa e motibo aki fraccion di MEP ta "factcheck" y pone tur documento riba nan website. E ta condena cu sr. Eman, despues di a haya un Koninklijk Besluit na 2014 pa mal maneho financiero y entrega autonomia financiero di pais Aruba, kier sigui manipula pueblo. A base di informacion fabrica y a base di manipulacion kier crea disturbio y intrankilidad.
REACCION ARENDSSegun Arends den un reaccion pa e portal aki, papiando na nomber di fraccion di AVP, ta sigura e portal aki cu ningun momento AVP y Mike Eman a ‘fabrica’ informacion. “No pasobra ta exactamente e mesun datonan ta wordo hinca den un graph pa ilustra. Pero no tin sprake di manipulacion ni tampoco ‘fake’. Asina Arends ta sigui bisa. Ora cu e portal a puntra Arends un biaha mas pa clarifica si e ora Eman a usa su propio grafieknan, pero usando informacion di CBA, Arends a bisa “Den algun di e sheetsnan. Pero mayoria ta copy paste di e survey”. Segun Arends, ningun hende no a bisa cu e graficonan tabata di CBA. “Riba presentacion di Mike Eman, e tabata indica claramente cu ta ‘Fuente CBA”. Ademas, segun Arends, si e graficonan ta di CBA of no, e ta un refleccion di e sentiment di e economia. “Si bo kier sconde tras di e declaracion literal cu ‘E graficonan no ta di CBA”, bo no ta conecta cu e realidad”, Arends a continua bisando. Ademas e ta splica cu ‘e profitability business a baha di 96 pa 75. Den tabel of graph e ta keda mesun 21 ppt’.
SETAR a tene su Avigilon ALTA Launch Event cu enfoke riba e futuro di seguridad
CBS: Bestaansminimum a subi atrobe na Aruba debi na aumento di gasto di cuminda
ORANJESTAD - E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
Follow NoticiaCla
