Lo bin un maximo den salario pa directornan di companianan estatal

ORANJESTAD - Prome Minister Evelyn Wever-Croes a haci un anuncio diabierna cu lo tin un maximo den salario pa directornan di companianan estatal pero no ta cla ainda cuanto esaki lo bira. Cambionan cu lo bay mira den e companianan aki, ta e salario di e directornan di e companianan estatal. Lo pone un maximo di loke un director por gana. Na Hulanda e maximo ta na 150 porciento di e salario di e Minister President. E plan aki a haya sosten di tur Parlamentario presente. Ainda ta delibera con ta bay regla esaki den ley. E plan aki ta den deliberacionnan tambe si Parlamento ta bin cu esaki den Ley di Iniciativa of Gobierno mes lo bin cu ne. 

CORPORATE GOVERNANCE CODE 

Wever a anuncia cu Gobierno lo bin cu un ‘Corporate Governance Code’. Esaki ta inclui e reglanan di integridad pa tur compania estatal mantene nan mes na nan. Esaki lo wordo aplica mesora den e gobernacion aki cu lo garantisa integridad den tur compania estatal di Gobierno. 

DIRECTORNAN NOBO

Wever a indica cu manera cu e ley aki bin na vigor, lo aplica esaki segun cu tin vacatura habri pa directornan nobo. Lo no mishi cu e derecho existente di directornan cu ta nombra caba y cu ta funciona na companianan estatal.