Programa Hulandes riba situacion na Venezuela ta hala atencion

HILVERSUM/ ORANJESTAD – E situacion di Venezuela y su relacion cu Aruba un biaha mas a bin na bista e siman aki durante un programa di television Hulandes, Zembla di BNNVARA riba NPO2 . E programa cu a pasa diaranson anochi ora di Hulanda a trata e tema di refugiadonan Venezolano yegando e islanan di Reino Hulandes den Caribe, particularmente Aruba y Corsou. Den e programa aki, loke a hala atencion ta e declaracionan di prome minister di Aruba Evelyn Wever riba e tematica, y su comentario riba e consul ‘nobo’ di Venezuela, Carlos Mata Figueroa. 

CONTENIDO

E programa di duracion di algo mas di mei ora, a pinta un cuadro actual di e situacion di refugiadonan Venezolano yegando tanto Aruba como Corsou. E ta sigui algun Venezolano, tanto legal como ilegal y nan experiencia. Tambe e ta repasa e loke a sosode cu a conduci na cierre di frontera entre Venezuela y e islanan ABC, y e accion di Hulanda pa a logra ‘habri’ esaki bek. E programa sinembargo ta cuestiona e acto aki, despues di a ilustra ken e actornan ta cu ken Hulanda a cera un acuerdo y e consecuencia di esaki. Por corda con despues di un bishita na Aruba y Corsou, minister Hulandes Stef Blok den un bishita relampago pa Venezuela, a yega na un acuerdo pa habri e frontera bek. Pero esaki no a keda ey sin mas, sino e programa ta mustra e consecuencia y e impacto di esaki tambe, pa Aruba. Y aki ta unda cu e entrevista cu prome minister Wever ta haya atencion. 

WEVER

Den un combersacion cu esnan di e programa ZEMBLA, graba na Aruba den Cocolishi, Wever ta cuminsa splica e situacion actual di Venezuela y Aruba pa loke ta e aspecto di refugiado. Segun Wever, e cantidad di boto cu ta yegando Aruba cu esnan ilegal, a aumenta ultimo tempo. E situacion di ‘refugiado’ ta parse ‘absorba’ na Aruba. Esaki pasobra segun Wever, e sa cu nan ta na Aruba (esnan ilegal), per obo no ta wak nan riba caya, pues e ta deduci cu nan tin dak riba nan cabez. E kier men cu bo no ta wak nan drumi riba caya. “Ningun hende ta muriendo di hamber na Aruba. Nan tin cuminda riba mesa” Wever ta sigui bisa, indicando cu posiblemente nan ta wordo yuda localmente.  “Aruba no ta un one happy island mas” Wever ta sigui bisa. A referi na e desempleo y situacion dificil cu tin na Aruba, mustrando tambe cu ni pa Aruba no tin hopi trabou, corda pa esnan di Venezuela. 

CONSUL

Loke a hala atencion ta e declaracionan haci riba e consul di Venezuela, Carlos Mata Figueroa, nombra e prome mitar di e aña aki como Consul General di Venezuela pa Aruba. E programa ta indica cu no obstante e hecho cu e homber lo no ta uno ‘limpi’ di problema, Hulanda a opta toch pa aproba su nombracion como consul. Na tal ocacion (NoticiaCla tambe a raporta esaki) e minister responsible Stef Blok a sigura cu no tin nada official cu ta stroba nombracion di Mata Figueroa. Den e programa aki, nan ta mustra Wever riba e hecho cu e no ta mustra entusiasma cu e nombracion. “Cu no no ta entusiasma? Esey ta corecto, pasobra bo ta tende yen di cos di dje”.  “Un hende bo ta prefer di no tine aki” Wever ta contesta. Pero mes momento Wever ta bisa cu no tabatin otro cos cu Hulanda por a haci. “No a keda nada otro pa no lague drenta (Aruba). Un hende asina bo ta prefera pa no laga drenta” Wever ta sigui bisa. “Pero diplomaticamente no tabata posibel pa tene afo” Wever ta sigui contesta. Si dado caso Mata Figueroa haci algo cu ta ilegal na Aruba, lo tin cu sake, segun Wever. 

RELACION CU HULANDA

Loke tambe Wever a papia Aruba ta e situacion entre Hulanda y Aruba. E ta cuestiona e hecho cu Hulanda di un banda no ta reconoce e gobierno Venezolano eligi e aña aki, pero cu di otro banda ta cera un acuerdo lucrativo petrolero cu nan. Riba e vice presidente Venezolano, Tareck El Aissami, tambe Wever a comenta. E ta bisa cu el a tende di e persona aki. Pero e lo no kier ta riba un potret cu un hende cu despues despues resulta cu e tabata envolvi cu un massacre. Wever no ta haci mencion aki di e vice presidente, pero e relacion ta haci. E entrevista a hala basta atencion tanto na Aruba como na Hulanda. Entre nan, riba e acuerdo cu Hulanda a cera cu Venezuela, varios parlamentario Hulandes kier mas claridad riba esaki. Por mira e ripiticion di e programa AKI. Fuente programa ZEMBLA. Potret ta screenshot di e programa.