AHATA: Balor di camber ta sigui mas halto pero ocupacion a baha bek

ORANJESTAD – E balor di camber di hotel na Aruba ta sigui mas halto pero ocupacion a baha bek. Asina  Aruba Hotel & Tourism Association (AHATA) ta raporta den un comunicado. Ee gremio hotelero a publica  cifranan di ocupacion y entrada di hotelnan pa luna di September 2018. E porcentahe averahe di ocupacion di hotel (Occupancy Rate) tabata 76.3%, un caida di 8.4 punto compara cu September aña pasa. Di otro banda e balor di camber ta sigui ta mas halto cu aña pasa. ADR (Average Daily Rate - e prijs averahe pa cada camber bendi) a subi 16.2% compara cu aña pasa pa $207.66. RevPar (e entrada averahe pa tur camber disponibel) tabata $158.48 na September 2018, un aumento di 4.7% compara cu un aña pasa.  Esaki ta nifica cu aunke e cantidad di turista ta menos, e hotelnan ta cobrando mas pa e cambernan. Manera NoticiaCla a publica den un raportahe anterior basa riba un entrevista cu e CEO di AHATA Tisa LaSorte, esaki ta cuadra cu e punto cu LaSorte a trece dilanti, esta cu prijs di camber tabata halto debi na demanda basa riba e situacion di 2017 di horcan unda cu hopi isla a perde nan inventario di camber di hotel. Algo cu lo ta bek mitar di otro aña. 

Pa e prome 9 lunanan di 2018 compara cu mesun temporada na 2017, a logra un aumento den RevPar di 11.7% pa un averahe di $230.23  y un aumento den ocupacion di 0.2% pa un averahe di 85.6%. Desde e efecto di horcan di September aña pasa, ainda Aruba ta ricibiendo efectonan positivo di limitacion di camber di hotel den Caribe. Turistanan cu lo a biaha pa e islanan afecta a opta pa islanan alternativo, manera Aruba y ta dispuesto di paga un tiki mas.  

“Nos ta nota awor cu poco poco e cifranan ta normalisando. E grado di ocupacion ta bahando segun nos ta nota e otro hotelnan den region Caribe ta habriendo despues di nan renobacion. E bon noticia ta cu ainda nos ta logra cobra un prijs mas halto pa e cambernan”, asina Tisa LaSorte di AHATA a splica. “Nos reto awor ta pa sigui mercadea efectivamente y sigui duna servicio di calidad halto pa nos por mantene un bon demanda pa Aruba como destinacion”, asina e ehecutivo di AHATA a subraya.

E cifranan ta basa ariba 15 hotel: Barcelo Aruba, Boardwalk Hotel, Brickell Bay Beach Club, Bucuti & Tara Beach Resort, Divi & Tamarijn All-Inclusive, Hyatt Regency Aruba, Manchebo Beach Resort, Marriott Aruba & Stellaris Casino, The Mill Resort, Renaissance Aruba Resort, The Ritz-Carlton, RIU Palace, RIU Antillas, Talk of the Town Hotel y Tropicana Aruba Resort.