No tin placa awor pa investiga proyecto di hospital

ORANJESTAD – Mientras cu gobierno kier haci investigacion aworaki riba e.o. e fayonan cometi pa cu e construccion di hospital nobo, no tin e placa pa haci tal. Por lo menos no awor, ta loke por a compronde di  minister di Salud Dangui Oduber den un reaccion pa NoticiaCla. E pregunta ta basa riba informacion cu e sindicato (TOPA) a divulga den curso di e siman aki. “Manera ta conoci e situacion di finanzas publico no ta duna nos e luho pa haci tur loke nos tin deseo di haci” Oduber a bisa NoticiaCla riba e pregunta cu si ta berdad cu no tin placa pa haci e investigacion awor. “ Ohala Aruba no tawata bancarota anto e ora ey, e investigacion di hospital lo a tuma lugar hopi tempo pasa”. E ta confirma cu e situacion pa loke ta trata e proyecto di hospital ta uno hopi grave. 

DESASTER HEREDA

E mandatario a bisa for di comienso di entrada di gabinete Wever Croes, cu mester investiga e proyecto aki pasobra tin yen di cos cu no ta hole bon y cu a bay malo. “ E proyecto di hospital aki ta otro  desaster cu nos a hereda! Esaki ta otro herencia cu a wordo firma y defendi pa ministernan di partido AVP y tambe Fraccion di AVP den periodo 2013-2017!” Oduber a cuminsa na bisa. E ta mustra cu no por core pa esaki si. “ Lamentabel e situacion aki cu nos ta deal cune na hospital! “ E ta haci mencion di e suma halto cu a keda comprometi di mas di 1 biyon florin. “ Den oposicion nos a cuestiona esaki, nos a critica e proyecto aki y awe nos ta bolbe haya rason pa loke partido AVP hunto cu su 12 parlamentarionan a para pe y awe nos tur ta cara e consequencianan di un done deal. Nos lo sa di atende cu esaki cu man duro!” e mandatario a sigui bisa.

LO HAYA PLACAE hecho cu awor no tin placa, no ta nifica cu lo no investiga e proyecto, segun Oduber. “E investigacion lo tuma lugar!” e mandatario a sigura e portal aki. “Hunto cu coleganan lo busca e fondonan necesario pa haci e investigacion aki” e mandatario a finalisa bisando. E no por a duna un timeline si pa ki tempo esaki lo tuma lugar. 

PROBLEMAManera ta conoci, e proyecto aki a conoce hopi dolor di cabez, cuminsando for di tempo di gabinete anterior, unda cu a bin resulta cu pa un motibo of otro, no a planea pa traha un camber di operacion nobo den e hospital, pasobra supuestamente a renoba esaki algun tempo prome. A resulta cu esaki no ta adecua y cu mester a inverti miyones extra pa rediseña parti di e hospital pa acomoda e camber di operacion. Ademas tabatin problema di construccion unda cu pa fayo tecnico, diesel tabata leak y plama den henter e edificio nobo varios biaha creando problema logistico y di salud pa tanto pashent como personal. E siman aki ainda, un kiebro di un tubo di awa a pone cu gran parti di e edificio nobo tabata bou di awa, pa cual mester a haci henter un ‘operacion’ pa por a pone e edificio bek den operacion. Asina tin un sin fin di problema, cu e mandatario kier bay investiga, cuminsando na e destaho, e compania cu a haya e proyecto, y e maneho di esaki. Den pasado, e director di hospital Ezzard Cilie a critica e maneho tambe di e instancia cu ta encarga cu supervision cu ta SOGA (Stichting Onroerend Goed  Aruba) y cu a te hasta ‘hint’ cu mester trece cambio na e contracto.