LaSorte: Mester traha pa mantene demanda halto pa hotel pa 2019

ORANJESTAD – Aruba no por afford di keda trankil awor djis pasobra e entrada di (mayoria) camber di hotel actualmente ta halto awor segun CEO di AHATA Tisa LaSorte. Recientemente LaSorte a sinta cu NoticiaCla pa un entrevista extenso y a toca varios tema, entre nan esaki. Pa loke ta e caso actual di demanda di camber, LaSorte ta referi na su preocupacion di  hecho cu pa medio di otro aña (2019), otro islanan den Caribe lo tin nan cambernan di hotel disponibel atrobe, cu ta cambernan cu nan a perde na 2017 debi na dos horcan. E hecho lamentable ey na 2017, a ‘yuda’ Aruba genera mas entrada na camber, y cu awor segun rapportnan,  ta mustra cu e ‘revpar’ (revenue per available rooms), osea entrada pa cambernan disponibel  ta mustra di ta halto. Algo cu lo por cambia otro aña si no haci nada. 

DICHO HULANDES

NoticiaCla a compara e situacion cu e dicho Hulandes esta ‘de ene zijn dood is de ander zijn brood’, cu ta nifica den e caso aki cu door di un situacion malo di otro (islanan afecta pa horcan), e ta beneficia Aruba (mas demanda pa nos hotelnan). “It’s a sad thing, but that’s the truth exactly” LaSorte a sigui bisa. “Manera cu e cambernan ta cuminsa habri bek den e Caribisch gebied, Aruba su trabou ta cuminsa bira mas duro atrobe”. Door di e situacion di (horcan na) 2017, Aruba por a ‘pidi’ un tarifa di hotel mas halto, debi cu tabatin un demanda mas halto. “Awor cu nan (e hotelnan den Caribe) ta bay habri bek, nan ta bay ta nobo nobo. Dus nos ta bay cometi awor cu cambernan nobo nobo, cu ta bay ta (na) un prijs mas abou pasobra nan ta bay purba atrae hende”, e CEO a sigui bisa. Eynan e kier men cu nos tin trabou di haci. 

PELIGER

Un posibel peliger cu LaSorte enberdad ta wak, ta cu Aruba por ta mucho trankil y facil awor, comfortable y no ta bay haci mucho esfuerso pa mantene e nivel di prijs y cantidad di hende manera awor. Esey ta un punto. E no ta kita afor segun LaSorte, cu Aruba ta(bata) super exitoso den genera entrada y demanda di turista di calidad. “Aruba ta haci hopi bon en general. Aruba su mercadeo ta hopi bon” LaSorte a sigui bisa. “Pero esey no kier men cu bo mester take it for granted”. Loke no ta yuda, ta cu tin e percepcion eyfo (di comunidad) cu hotelnan ta semper yen di placa. Segun e CEO, no mester confundi entrada cu ganashi. “Si bo gastonan tambe ta subi, bo profit (ganashi) no ta subi” LaSorte a sigui bisa. E ta mira cu e situacion cu e ta premira (esta cu cambernan nobo lo cuminsa habri), lo cuminsa pa mitar di 2019 ora cu mayoria di e cambernan den region di Caribe lo habri bek. Pues segun LaSorte, Aruba tin trabou pa haci pa por genera demanda pa fin di 2019. Esey no necesariamente kier men cu nos tambe tin cu baha prijs, sino mas bien mercadea pa hisa e demanda, y aun mantene e nivel di turista cu nos tin aworaki. “Aruba ta hopi caro, pero tin hende ta willing pa pague. Pero e ora mester mercadea na e hendenan ey cu bo por crea e demanda y cu bo ta atrea e persona cu lo paga e prijs ey” LaSorte a sigui bisa.