Valero: Lo no baha e handling fee cu e ta cobra WEB

SAN ANTONIO – Refineria Valero lo no baha e ‘handling fee’ cu e ta cobra WEB Aruba aworaki. De hecho, e hecho cu prijs di petrolio ta baha of bahando, no ta afecta e ‘handling fee’ pasobra e ta basa riba gastonan fiho. “Pues e no ta fluctua cu prijs di petrolio”. Asina vocero di e refineria, Bill Day a confirma na NoticiaCla.com diahuebs mainta. “Valero ta perde placa door di maneha e fuel aki; pues un reduccion adicional den e fee aki, no ta posibel aworaki”.

Segun Day, e handling fee ‘chikito’ ta cubri e gastonan di Valero pa offload, warda, keinta y transporta e ‘heavy fuel’ cu WEB ta uza, parcialmente. “Valero no solamente no tin ganashi riba e fee aki” Day ta sigui bisa. “E fee no ta ni cubri nos propio gasto. Valero ta sufri cu maneho di e fuel aki”. Pues un reduccion adicional di e fee, no ta posibel aworaki. Un di e kehonan cu tin aworaki, ta cu no ta compronde pakico no por reduci e ‘handling fee’ si e prijs di petrolio ta bahando, te na nivelnan record aworaki. Pero segun Day, e ‘handling fee’ ta basa riba e gastonan fiho, manera labor, coriente, almacenahe di e fuel. “Esaki no ta fluctua cu e prijs di petrolio”. Foto archivo cortesia www.artendesign.com