Ruiz: Prijs maximo stipula pa producto di canasta basico ya ta inclui BBO/BAZV/BAVP

ORANJESTAD – Prijs maximo stipula pa producto di canasta basico ya ta inclui BBO/BAZV/BAVP. Asina minister di economia Xiomara Ruiz Maduro a clarifica den un comunicado diaranson. Segun e mandatario, den Pueblo hopi bez por scucha e discusion si riba productonan di canasta basico mester cobra BBO/BAZV/BAVP si of no. Pa e motibo aki e mandatario hunto cu Departamento di Asuntonan Economico (DEACI) a haya necesario aclarea e situacion y concientisa tur consumidor cu prijsnan maximo stipula pa productonan di canasta basico ya ta inclui BBO/BAZV/BAVP, den cada publicacion. Aki ta trata di productonan den canasta basico cual ta aros, azeta, cuminda di baby, hariña di maishi, lechi polvo, lechi likido, margarina, manteca, koffie, te y sucu. Consumidornan mester tene bon na cuenta cu e prijs na caha no por surpasa e prijs maximo inclusivo BBO/BAZV/BAVP calcula pa Departamento di Asuntonan Economico y Industria (DEZHI). Si bo persona paga mas cu e prijs maximo, por favor tuma contacto cu e departamento di DEZHI na telefoon 521-2423. Ademas Ruiz a recorda cu tin un app disponibel den cual por verifica e prijs maximo di tur producto den canasta basico, por haya informacion di comparacion di prijs di producto den e macuto di compras y por haya sa e prijs di productonan petrolero.  Por download e app “Control di prijs”, cual ta disponibel riba Google Play y App Store.