Tevreden: Lo organisa marcha final

ORANJESTAD – Comision Accion Nacional (CAN) a rechasa contesta di gobierno cu nan a haya riba nan manifiesto. Y e peticion a bin pa un marcha final tuma lugar. Durante nan ‘reunion nacional’ diaranson anochi na Centro di Barrio Tanki Leendert, unda cu entre 140 pa 160 hende a asisti, lider di e organisacion Comision Accion Nacional Hendrik Tevreden a repasa e contesta di gobierno riba e manifiesto cu nan a entrega. Resultado ta cu nan no a acepta e contesta y ta determina pa continua cu e lucha. Comparando e lucha cu parto di un yiu, Tevreden a pidi esnan presente (particularmente hende muhe) pa yuda ‘duna luz na libertad’. A mustra cu tin cu uni forza, ‘schouder cu schouder’ y laga e yiu cu yama libertad, nace atrobe. Entre esnan presente por a tuma nota di entre otro presidente di sindicato TOPA, Rene Bernabela, e lider di grupo di 7 Rocky Kelly, y varios integrante di e partido di oposicion.

For di siman pasa diaranson, CAN a anuncia cu nan ta tene un reunion nacional pa discuti e siguiente paso cu nan lo tuma. Un dia despues, gobierno a entrega e documentonan rekeri na CAN, aunke no a cumpli completamente segun Tevreden. "Nan no a duna nos e jaarrekeningen di Utilities", Tevreden a bisa NoticiaCla.com na e ocasion ey. Minister responsabel pa utilidad, Mike de Meza, a informa cu nan no a haya e peticion aki. Tevreden no tabata interesa mas den e documento ey, y a dicidi di trata solamente e documentonan cu nan a ricibi.