Oduber: Gobierno yegando na acuerdo cu APFA pa paga debe di Serlimar

ORANJESTAD – Gobierno di Aruba ta yegando na un areglo cu e fondo di pensioen APFA, cu ta nifica cu e ‘opbouw’ di pensioen di e trahadonan di Serlimar por continua. E mandatario encarga cu Serlimar, Otmar Oduber a splica diamars den un conferencia di prensa cu combersacionan por conclui e siman aki cu un acuerdo y cu ta nifica cu tur cos lo ta ‘ok’ atrobe. Esaki despues cu ,- manera cu NoticiaCla a raporta den fin di siman-, APFA a pone un paro na e ‘opbouw’ aki debi na falta di pago di parti di Serlimar. Trahadonan di e compania a ricibi un carta di APFA indicando cu nan doño di trabou tin 3 luna sin deposita placa na APFA. Oduber a comprometi cu lo percura pa cubri e placa cu falta, mirando cu ta gobierno ta esun cu ta financia 90% di e gastonan di e compania. 

SITUACION FINANCIERO

Durante e mesun raporta cu NoticiaCla a haci den fin di siman, a haya confirmacion di e mandatario cu tabata trata di un situacion cu ta data di varios aña y cu ta un debe particular cu APFA di riba 2 miyon florin. Diamars durante e conferencia, e mandatario a mustra cu cifras, cu e situacion di Serlimar ta hopi precario mes y cu e situacion actual ‘no ta houdbaar mas’. Resumiendo tres aña so di cifra defundi di e cuentanan annual di 3 aña (2015-2017), na tur Serlimar tin un debe di 11 miyon florin na pago di e.o. APFA, AOV, Loonbelasting, AZV, y BBO/BAZV. Pa loke ta e 3 lunanan habri cu APFA a referi na dje den e carta recien, Oduber a splica cu ta trata di 195 mil florin cu ta habri. Pero esey ta tres luna so, y e debe cu APFA ta riba 2 miyon. Gobierno a confirma cu nan lo atende cu e situacion.