Di 7 mil camber di hotel extra, gobierno obliga pa honra 3 mil

ORANJESTAD – Tin un total di 3 mil camber di hotel extra otorga pa gobierno anterior, cu gobierno actual no por haci nada otro sino honra of purba ‘adapta’. Ademas tin mil camber cu gobierno actual ta kere cu por para ainda di bira un realidad. Na tur, di e mas of menos 7 mil camber otorga pa gobierno anterior, gobierno actual a logra elimina 3 mil. Cu esaki, e inventario ta cla cu ta duna un bista mas cla riba kico tur a wordo duna pa gobierno (anterior) na camber extra pa desaroyadornan. Asina minister di infrastructura Otmar Oduber a splica diaranson mainta durante un conferencia di prensa special. 

SITUACION

Durante e conferencia aki, Oduber a expone un lista di e 7 mil y pico camber extra cu gobierno anterior a duna, di cual varios di nan a wordo otorga net prome cu e eleccion di 2017. Ribae lista y pakete grandi di documento cu Oduber a publica, por a mira cu tur tabata firma pa ex minister y actual parlamentario Benny Sevinger. Oduber  a purba mustra cu esaki, cu e ta spera cu definitivamente e bay bin di informacion por para, door di mustra e documentonan, cu tin firma di Sevinger y no Oduber. Oduber a sigura prensa cu desde cu e ta sinta como minister di infrastructura, e no a otorga ni un proyecto hotelero of expansion di hotel cu mas camber. Loke e ta admiti di a duna si, ta tereno pa p.e. un cinema, y tereno pa cierto negoshi, pero no hotelero y sigur no pa cambernan extra di hotel. 

CANTIDAD DI CAMBER

E cifra ‘magico’ di 7 mil ta e cantidad di camber otorga, y cu e documentonan na man, Oduber a mustra prensa exactamente ken tur a haya esaki pa e gobierno anterior, complete cu number y mas informacion. For di e 7 mil, Oduber a splica cu a logra di elimina 3 mil camber door cu desaroyadornan di esakinan sea no a cumpli cu e reglanan pa haya e terenonan necesario y cu otro incumplimento, a pone cu por a stop esaki sin cu e lo a nifica casonan den corte cu por causa gobierno hopi placa. Placa cu gobierno actualmente no tin. Ainda tin posiblemente mil camber cu gobierno por ‘deshaci’ di dje, y e ora ta keda e cantidad di mas of menos 3 mil camber cu gobierno ‘lamentablemente’ mester hora. Esaki ta casonan cu e desaroyadornan a cumpli, cu ta pone cu gobierno no por haci anda otro, y otronan cu ta aun mas avansa, y a pasa acta caba na notario. Esey sigur no por haci nada. Loke a purba haci cu nan, ta purba negosha y cambia esaki den forma di sea cambia e destinacion manera cambia e proyecto di un ‘all inclusive’ pa un EP (European Plan) esta hotel regular, of di condominium pa apartamento, of cambia e destinacion di e proyecto completo. Tambe si no a logra cambia e destinacion of producto, purba logra reduce e cantidad di camber cu a keda otorga. Gobierno no a keda cla ainda cu esaki totalmente y ta den negosacion cu varios, manera e proyecto di The Sands. 

GOBIERNO ANTERIOR

Segun Oduber, e lista di tereno pa 7 mil camber di hotel otorga, tabata den e 8 aña di gobernacion anterior di gabinete Mike Eman I y II, di cual 70% di esaki a keda otorga den e ultimo 2 añanan di gabinete Mike Eman II, esta 2016 y 2017.