BCA: Activo domestico netto y reserva di divisa netto a subi

ORANJESTAD - Den e luna di juli 2018, e cantidad di placa den circulacion a subi cu Afl. 90,3 miyon te na Afl. 4.421,0 miyon, compara cu juni 2018. Esaki a resulta door di mas e activo domestico netto (+Afl. 57,5 miyon) y reserva di divisa netto (+Afl. 32,8 miyon). 

E crecemento den e activo domestico netto a wordo causa pa un expansion den credito domestico (+Afl. 57,1 miyon). E desaroyo den credito domestico a resulta for di un subida den credito bancario na e sector priva (+Afl. 34,8 miyon) y den credito bancario netto na e sector publico (+Afl. 22,3 miyon). E expansion den credito na e sector priva ta debi na mas credito na empresa (+Afl. 23,3 miyon) y hipoteca pa vivienda (+Afl. 13,5 miyon), mientras credito na consumidor a baha (-Afl. 1,9 miyon). E subida den credito bancario netto na e sector publico a resulta primordialmente for di un bahada den depositonan di gobierno (-Afl. 22,0 miyon).   

E reserva di divisa netto di e sector bancario a crece (+Afl. 32,8 miyon) debi na compra netto di divisa for di publico (+Afl. 214,2 miyon), primordialmente relaciona cu entrada for di turismo. Esaki a wordo mitiga pa un gran parti pa benta netto di divisa na publico (-Afl. 181,4 miyon), principalmente relaciona cu entrada for di importacion di mercancia.

Inflacion

E nivel general di prijs, cu ta wordo midi door di e indice di prijs di consumo, a registra un subida di 5,1 porciento den e luna di juli 2018, compara cu juli 2017. E contribuyentenan principal na e aumento aki ta e componentenan “Transporte”, “Cuminda y Bebida No-Alcoholico” y “Recreacion y Cultura”. Tur e otro componentenan tambe a registra subida. Si exclui e componentenan di cuminda y energia for di e indice di prijs di consumo, inflacion a mustra un aumento di 2,5 porciento compara cu juli 2017. Pa loke ta trata e promedio anual di e tasa di inflacion, esaki a registra 1,3 porciento na juli 2018, compara cu 0,8 porciento na juni 2018.

Turismo 

Na juli 2018, e cantidad di turista a registra 101.386 bishitante, cual ta 886 bishitante (-0.9 porciento) menos cu na juli 2017. E bahada aki a resulta door di un caida den e mercado Latino Americano (-4.380 bishitante of -20,8 porciento) y e mercado Europeo (-515 of -5.9 porciento). Di otro banda, e mercado Norte Americano (+3.079 bishitante of +4.4 porciento) a bai conoce subida.

E bahada den e mercado Latino Americano ta relata principalmente na menos bishitante di Venezuela (-5.254  bishitante of -53,1 porciento) , mientras cu e caida den visitante di Europa ta debi na un bahada den visitante for di Inglatera (-1.262 bishitante of -46.4 porciento) . E crecemento den e mercado Norte Americano a resulta principalmente door di mas bishitante for di Merca (+3.059 bishitante of +4,6 porciento). 

E cantidad di turista crucero a registra un subida di 14.482 bishitante of 45,4 porciento te na 46.370 bishitante na juli 2018, compara cu juli 2017. E cantidad di barconan a subi for di 14 na juli 2017 pa 16 na juli 2018.

Entrada di Gobierno

Na juli 2018, entrada di gobierno a suma Afl. 83,2 miyon, cual ta Afl. 0,6 miyon mas compara cu e mesun luna di e aña anterior. Esaki a resulta for di un expansion den entrada di impuesto (+Afl. 6,7 miyon) y un reduccion den entrada no relata na impuesto (-Afl. 6,1 miyon ).

E subida den entrada di impuesto ta relata principalmente na mas entrada for di impuesto riba salario (+Afl. 2,4 miyon), impuesto riba ganashi (+Afl. 1,8 miyon),  impuesto riba entrada (+Afl. 1,6 miyon), accijns riba tabaco

(+Afl. 1,2 miyon), impuesto riba importacion (+Afl. 1,2 miyon), y e asina yama ‘transfer tax’ (+Afl 1.0 miyon). E crecemento aki a wordo parcialmente mitiga pa menos entrada for di impuesto riba divisa (-Afl. 2,2 miyon).