Lampe: Colegio toets’ ta wordo reemplasa cu ‘nacionale toets

ORANJESTAD – E ‘Colegio toets’ ta wordo reemplasa cu ‘nacionale toets’. Asina minister di Enseñansa Rudy Lampe recientemente a anuncia. E ta parti di algun cambio cu lo wordo haci den e ultimo fase di e aña escolar aki. E cambionan aki ta facilita enseñansa pa tur mucha na Aruba y sigur lo duna miho resultadonan pa e desaroyo di nos muchanan. 

TOETS

Un cambio importante ta un ‘Nacionale Toets’ pa tur mucha. Cu e introduccion di e ‘toets’ aki, Colegio Toets lo wordo elimina. Tur mucha di tur klas 6, lo haci e mesun toets. A base di un norma nacional lo dicidi cua mucha lo ta un candidato pa Colegio, pa Mavo of pa EPB.

TRAYECTORIA DI ESTUDIO

Segun Lampe, si un mucha tin un trayectoria di estudio na scol basico cu por cu e reto di Colegio pero no a pasa e normering di e toets, toch e lo wordo manda Colegio teniendo cuenta cu un toets ta un ‘momentum opname’. Pa un of otro motibo e mucha no a pasa e toets, entre otro lo e no tawata sinti’e bon di salud e dia ey, of circumstancianan na cas a haci cu e no pasa e toets. Den casonan asina lo tene cuenta cu e trayectoria di con e mucha a eherce den scol basico. Lampe: “No por basa e futuro di un mucha riba un ‘momentum opname’ sino riba su logronan durante scol basico”. 

E titular di Enseñansa ta indica cu e implementacion di e ‘Nacionale Toets’, lo tin como consecuencia cu lo tin mas mucha tambe cu lo por bay Havo entre otro. Preparacionnan ya caba ta wordo haci pa e fluho extra di hobennan cu esaki ta bay trece na augustus 2019 na e diferente nivel di scolnan na Aruba.