Confrontacion pa motibo di pamfleta

ORANJESTAD – Entrega di un pamfleta diaranson atardi a percura pa un confrontacion entre  esnan cu a bin sostene sra Hyacinta Thijsen su entrega di un manifiesto, y cierto miembronan di gobierno. E intencion tabata pa un otro manifiesto cu meta pa revoca e tarifa di coriente  keda entrega diaranson atardi na prome minister Mike Eman. Diferencia ta cu e no tabata un manifestacion cu marcha, sino un actividad di un persona (sra Hyacinta Thijsen), cu a wordo acompaña pa un grupo di persona. Mayoria di nan, simpatizantenan di partido di oposicion, hunto cu otro gruponan cu a yega di manifesta caba. Y un biaha mas, gobierno a priminti un contesta riba e manifiesto. “Mi a wordo priminti un contesta diabierna awor pa 4’or” Thijsen a bisa NoticiaCla.com diaranson anochi. “Mi ta bay atrobe pa busca e contesta y mi ta pidi tur hende bolbe companjami. Mi a palabra cu polis caba” Thijsen a sigui bisa NoticiaCla.com.

Contrario na otro entrega di manifiesto, esaki tabata pues idea di un persona, cu no a marcha, sino mas bien a topa su ‘siguidornan’ dilanti bestuurkantoor mes. Momento prome cu e entrega, simpatistantenan di gobierno a cuminsa reparti pamfleta na esnan cu a bin sostene sra Thijsen. Durante e momento aki, tabatin algun intercambio fuerte di palabra y confrontacion, cu a keda controla pa personal di seguridad di gobierno mes, sin cu mester ta tin intervencion cu polis.

Pa diahuebs, grupo di 7 a planea otro accion. E biaha aki dilanti di un gulido na Palm Beach, como protesta cu esaki lo por bira un problema structural ora cu awa yobe, y Comision Accion Nacional a anuncia un otro marcha, considera como nan ultimo.