Gobierno evaluando cambio di horario pa cierre di clubnan nocturno

ORANJESTAD – Gobierno ta evaluando pa trece cambio na horario di  cierre di clubnan nocturo na Aruba. Asina minister di husticia Andin Bikker a bisa den un conferencia di prensa. E mandatario a bisa cu e ta bay presenta un concepto na conseho di minister. Y den esey e lo tene cuenta cu e ley di vergunnings verordening cu ta uno hopi anticua. Algo cu e ta bay haci cu minister di Salud Dangui Oduber, bou di cual e competencia comparti ta cay. E dunamento di permiso pa e establecimento ta di Oduber, pero e decision di cierre di club ta cay bou di Bikker. Segun e mandatario, ta purba haya un balansa, unda cu tin cu tene cuenta cu e industria turistico, cu gusta e area aki y tin e poblacion local cu tin keho riba clubnan nocturno ubica den barrio cu ta causa molester. Mes momento tin cu bay check e dimension nobo debi cu e ley ta hopi anticua, pasobra awor e ley solamente ta permitibo duna un boet, of revoca e permiso. Na Hulanda tin un concepto nobo unda cu por impone un multa of instruccion pa motibo di molester, esta e last onder dwangsom.