Tanto AVP y MEP ta sostene un ‘geschillencomissie’

ORANJESTAD – Tanto partido AVP como MEP ta pro pa bin cu un asina yama geschillencomissie, pa asina por aclarea disputanan cu por tin den e caso aki, entre dos of tres pais. De hecho, partido AVP su exponentenan, lider di fraccion di AVP Rene Herde y actual minister di Finanza Juan David Yrausquin na 2010 na varios occasion a presenta un mocion pa tal comision tuma lugar, pero pa varios motibo esaki no a sosode. Segun Herde a splica NoticiaCla e siman aki, si tabatin un geschillencomissie, nan lo por a atende e asunto cu gobernador di un miho forma. Aworaki lamentablemente e posicion di gobernador no por atende cune sin mas. Y pesey nan no por a haci mas riba e actuacion –cu nan ta considera straño y inconstitucional- di gobernador.

Di parti di partido MEP, su lider Evelyn Wever Croes a mustra NoticiaCla cu nan tambe ta pro un asina yama geschillencomissie, y a te hasta presenta esaki den forma di mocion durante e ultimo tratamento di presupuesto. Aki nan a mustra pa cuminsa, cu mester tin un tipo di organo (of usa Raad van Advies mes como tal) pa por resolve preguntanan of casonan di diferencia di opinion entre dos instancia –of pais den e caso aki-, sin cu e tin cu crea un problema entre e dos instancianan aki. Pero ambos biaha e mocionnan aki no a mira luz di dia, pasobra no a aproba nan. Entre e mocion su meta, tabata pa ora cu presupuesto tambe keda trata cu tur e cambionan, pa scrutina esaki un biaha mas door di un comision. Pero e funcion mes di un geschillencommissie sigur ta conta cu aprobacion di partido MEP tambe.

Prome minister Eman a boga awor pa un comision asina, pa e motibo cu e ta evita cu mientras cu tin un discusion entre dos pais, e relacion wordo daña. Si tin dos pais cu un diferencia riba un asunto, ta entrega e problema den man di e comision, mientras e paisnan mes ta sigui nan curso sin cu tin un impasse. Si no tin esaki, e problema ta crea un impasse y ta mas sigur crea un ruptura porta irreparable entre e dos paisnan aki.A ofrece te hasta pa bin cu un tipo di Corte pa esaki, pero esey no ta necesario pasobra ya tin e mechanismonan legal pa atende cu esaki.

Geschillencommissie: Un comision asina ta un instancia cu normalmente ta dicidi riba cuestionan mas comercial ora cu hendenan mes no por yega na un acuerdo. Un comision asina hopi biaha ta limita nan mes riba cierto tereno di experticio, y ta wordo instala door di un instancia specifico. E trabou (resultado) di un comision asina, ta desemboca den un conseho cu ta final (bindend) y ta wordo seya y ancra den un asina yama ‘vaststelling overeenkomst’.