Exclusivo: Director di DOW ta splica tardansa riba Watty Vos Boulevard

ORANJESTAD – Considera como  un ‘fayo’ durante nan investigacion di e area pa trabou, e compania Mota Engil awor ta ‘pagando e prijs’ cu ta traduci den un otro tardansa den e proyecto Watty Vos Boulevard. Director di Dienst Openbare Werken (DOW) Marlon Croes den un entrevista exclusivo extenso pa NoticiaCla, ta referi den e caso aki na e duiker cu mester a traha di nobo, causando otro tardansa den e proyecto. E ta considera esaki un di e ‘golpinan bou di faha’ mas cu ta pone cu e proyecto ta conociendo mas tardansa. Den e entrevista, Croes ta detaya asina varios aspecto di e proyecto y e causa di e problemanan, for di inundacion pa awa, te na e duikernan cu mester a keda reconstrui completamente. Un punto hopi cuestiona mientrastanto, a keda revela diahuebs, esta e ‘strepinan’ straño prome y riba e rotonde di Cumana.

PREOCUPA

“Mi ta hopi preocupa” Croes a bisa e portal aki, unda cu Croes ta referi riba e tempo cu ta tumando pa completa e obra grandi aki. Trabou riba 7 km di caminda di Aruba, completo cu 7 pa 8 rotond directo conectando esaki, y varios otro rotonde na banda pa regla e fluho di trafico. Na tur casi 17 rotonde a conta, cu mester ta cla den curso di otro aña. Y mirando cu e proyecto mester keda completa augustus 2019, e ta preocupa Croes cu tin basta trabou ainda pa haci. Di otro banda, e ta comprendibel, mirando e grandura di e proyecto, cu Aruba nunca antes no a conoce.  

DUIKER

Algun tempo pasa, NoticiaCla a raporta caba riba e aspect di e duiker, esta e structura cu ta laga awa pasa bou di tera/caminda.  Segun Croes, nan no tabata na altura di e duiker, y su condicion ora cu a haci e inspeccion prome cu a cuminsa cu e trabou. Consecuencia ta cu esaki ta causando un retraso di por lo menos dos luna. Ora cu a haci e investigacion prome cu e trabou, no a cay riba e duiker aki. Despues a bin nota cu e condicion di e duiker no tabata optimal. Y pa evita problema despues, e compania a opta pa trahe full di nobo, cu tur su consecuencianan. 

GASTO Y PAGO

Segun Croes, parti di e contract di DBM (Design, Built and Maintain) pa e proyecto di PPP (Public Private Partnership), unabez cu e compania entrega e proyecto, e mester ta operacional y functional pa gobierno por paga e compania. Pero si e proyecto no ta operacional dado momento despues di entrega, gobierno no tin e obligacion di paga e compania. Y pa evita e risico cu despues di entrega, e duiker cay den otro cu consecuencia cu mester para e proyecto, habri caminda y stroba trafico, a opta pa haci e trabou awor. E consecuencia directo pues, ta un retraso di 2 luna. Awor e duiker ta den pleno construccion y ta kere cu pa fin di e luna di October, e por ta cla pa asina e resto di trabou sigui. Croes a sigui splica cu un duiker mester por fungi pa por lo menos 80 pa 100 aña. E duiker en cuestion a wordo traha pa DOW na añanan 80, pero e no sa unda cos a bay fout, cu e calidad di e duiker ta den tal forma cu e ta den cay den otro. “Con bin no a haci e analisis, no ta conoci pami” Croes a bisa. E ta straño si tene na cuenta cu e compania en cuestion durante e destaho publico, ta esun cu mas investigacion a haci pa e proyecto. 

PUBLICACIONAunke e director ta admiti cierto nivel di preocupacion, e ta sigur cu cos lo keda cla toch, y cu suministro di mas informacion den futuro, lo por tene e comunidad mas miho informa y tambe duna un splicacion amplio di kico tur ta warda nos pa e proximo aña, eliminando posibel angustia, rabia y stress pa motibo di trafico. E director ta conciente cu nan ta wordo tilda di ta ingeniero di awa dushi, cu trabou ta barata etc, pero unabez cu e informacion ta conoci, pueblo lo compronde cuanto cos tin tras di e proyecto gigantesco aki. Y e ta admiti falta di a duna mas informacion, aunke periodicamente y cu basta frecuencia ta duna informacion si. Pero esaki tur ta bay aumenta awor pa evita malgusto y malentendimento. Entre nan, esun di e rotonde na Cumana y  problema di awa, cu por a wordo evita si a informa mas prome riba e tema.