Awe nochi Xander y Didi ta topa otro den Playoff Liga Americana

BOSTON – Awe nochi fanaticonan di baseball grandes ligas ta haya chens di wak dos rival eterno di otro topa, y cu un toke hopi special. Boston Red Sox y New York Yankees ta rival di semper, pero loke ta hacie mas special ta cu tin hungadornan di Aruba y Corsou ta milita den nan, cu ta dune un toke mas ‘local’. Aruba tin un fanaticada hopi grandi mes di New York Yankees, pero tambe hopi ta simpatisa Xander Bogaerts como Arubiano den Boston Red Sox. Pues tin un ‘division’ na Aruba riba e tema ey, pero esey no ta kita afor cu e wega ta keda sumamente interesante. NoticiaCla a confirma cu Telearuba lo pasa tur e weganan aki, incluyendo esun di playoff cu ta cuminsa diabierna (awe nochi) 7.35pm entre New York Yankees y Boston Red Sox. Dos yiu di tera, hungando contra otro profesionalmente, unda cu un di nan tin cu cay afo. Tabatin duda cu Didi Gregorius (Corsou) lo no tabata den e alineacion, debi na lesion, pero ta mustra cu e lo ta den alineacion toch. Ambos, tanto Bogaerts como Gregorius ta hungado e mesun posicion pa nan respectivo ekipo, esta Red Sox y Yankees. Nan a topa otro varios biaha caba e temporada aki, pero awor ta playoffs y esaki semper ta dune un toke mas special. 

ANALISIS PROFESIONAL

Segun analisis di experto, ambos ta bon, pues cua cu bo scohe, sea ta Xander of Didi, no tin un contesta robez. Ambos tabatin un bon temporada di bateo. Gregorius ta wordo mira como miho defense, pero Bogaerts su bateo ta dune e ventaha, y ta keda e pregunta di e pols drechi di Didi, con esaki lo afekte. Loke ta mas importante ta e hecho cu Red Sox tin e asina yama ‘home field advantage’, ya cu e prome wega ta na Boston. Esaki ta importante pasobra Gregorius na cas, ta completamente diferente cu ora cu e ta riba caminda. 

Exito na e fanaticada di ambos. Potret cortesia Baseball Aruba.